Lehe Viyẹyẹ Mose Yin Whinwhlẹngán Do
OTÀN 28
Lehe Viyẹyẹ Mose Yin Whinwhlẹngán Do
PỌ́N viyẹyẹ he to avivi bosọ hẹn alọvi awhli lọ tọn go. Mose wẹ e nọ yin. Be a yọ́n awhli whanpẹnọ lọ ya? Ahọvi Egipti tọn de wẹ, yèdọ viyọnnu Falo lọsu titi tọn.
Onọ̀ Mose tọn whlá viyẹyẹ etọn kakajẹ whenue e tindo osun atọ̀n, na e ma jlo dọ Egiptinu lẹ ni hù i wutu. Ṣigba e yọnẹn dọ yé sọgan wá mọ Mose, enẹwutu nuhe e wà nado whlẹn ẹn die.
E yí ohà de bo sásẹ̀ndo e go to aliho de mẹ na osin nikaa biọ e mẹ. Enẹgodo e ze Mose do ohà lọ mẹ, bo ze e do ogbé mẹ to Tọ̀sisa Nile tó. Nọviyọnnu Mose tọn Miliami yin didọna nado nọte sẹpọ finẹ bo pọ́n nuhe na jọ.
E ma dẹn bọ viyọnnu Falo tọn wá Tọ̀sisa Nile tó nado lawu. To ajiji mẹ, e mọ ohà lọ to ogbé mẹ. E ylọ dopo to deviyọnnu etọn lẹ mẹ bo dọmọ: ‘Yì ze ohà enẹ wá na mi.’ To whenuena ahọvi lọ hùn ohà lọ, viyẹyẹ whanpẹnọ de wẹ e mọ to e mẹ. Mose to avivi bọ onú etọn wàlẹblanuna ahọvi lọ. E ma jlo dọ Mose ni yin hùhù.
Whenẹnu wẹ Miliami wá. A sọgan mọ ẹn to yẹdide lọ mẹ. Miliami kanse viyọnnu Falo tọn dọmọ: ‘Be a jlo dọ yẹn ni yì ylọ Islaelivi yọnnu de wá he na penukundo viyẹyẹ lọ go na we ya?’
Ahọvi lọ dọmọ: ‘Jaale bo yì ylọ ẹ wá.’
Enẹwutu Miliami yawu họ̀nwezun bo yì ylọ onọ̀ etọn wá. To whenuena onọ̀ Mose tọn wá, ahọvi lọ dọna ẹn dọmọ: ‘Yí viyẹyẹ ehe bo penukundego na mi, yẹn nasọ suahọ we.’
Gbọnmọ dali, onọ̀ Mose tọn penukundo ovi etọn titi go. To whenuena Mose whẹ́n jẹ obá de mẹ, onọ̀ etọn plan ẹn yì jo na viyọnnu Falo tọn, mẹhe yí i do basi ovi etọn. Lehe nulẹ yì do bọ Mose do wá whẹ́n to owhé Falo tọn gbè niyẹn.
