Omuano okanatje Moses mbu ka yamwa
EHUNGI 28
Omuano okanatje Moses mbu ka yamwa
TARA okanatje okaṱiṱi ku make riri, nu ku ka handa komunwe womukazendu. Okanatje ngo o Moses. Mo tjiwa kutja omukazendu omuwa ngwi ouṋe? Eye omusuko ombara waEngipte, omuatje waFarao omuini.
Ina yaMoses wa horeka okanatje ke ngandu indu tjika tjita omieze vitatu, mena rokutja kaa vanga kutja oko ke zepewe i Ovaengipte. Nungwari eye aa tjiwa kutja Moses mape ya a munikwa, okutja eye ombya tjita kutja ma yamwe.
Eye wa toora, otjimbamba ne tji ṱunu nawa kutja omeva aye ha roro okuhita mo. Okuzambo a twa mo Moses mutjo, na twa otjimbamba mokati komahozu omare meṋe yonḓonḓu Nil. Mirjam, omuṱena waMoses, wa raerwa kutja nga kurame popezu nu ma tarere mbi mavi kayenda po.
Kombunda yanao omusuko waFarao we ya koNil okuyekurikoha. Tjimanga a munu otjimbamba momahozu omare. Eye wa raera kuumwe wovasuko ve ovemuungurire a tja: ‘Twende u ke ndji etere otjimbamba tjo.’ Omusuko wombara tja paturura otjimbamba, eye wa muna okanatje okawa. Okanatje Moses aake riri, nomusuko wombara ee ke ṱire ondjenda. Eye kaa vanga kutja oko ke ṱe.
Okuzambo Mirjam we ya mbo. Ove mo mu munu motjiperendero. Mirjam wa pura omusuko waFarao: ‘Hi yende nu mbi ke ku isanene omukazendu Omuisrael me ku nyamisisire okanatje?’
Omusuko waFarao wa tja: ‘Ii, osemba.’
Kunao Mirjam wa tupuka tjimanga okukaraera ina. Ina yaMoses tje ya komusuko wombara, omusuko wombara wa tja: ‘Kambura okanatje nga u ke ndji nyamisisire. Ami me ku sutu.’
Kunai ina yaMoses wa kaṱakamisa okanatje ke omuini. Kombunda Moses tje kurire nawa, eye we mu twara komusuko waFarao, ngwe mu toora ne mu tumbu otja omuatje we omuini. Momuano mbo Moses ope kurira mondjuwo yaFarao.
