KWASISYA kana kaa kekũĩa kakwatĩte kyaa kya mũndũ mũka. Ũũ nĩ Mose. We nĩwĩsĩ mũndũ mũka ũsu mwanake ũu nũũ? Nĩ mwĩĩtu wa Valao, mũsumbĩ wa Misili.

Inyia wa Mose avithie kana kake nginya kavikya ũkũũ wa myei ĩtatũ, kĩtumi nũndũ we ndendaa koawe nĩ Amisili. Ĩndĩ nĩweesĩ kana Mose nũtonya kwoneka, kwoou ũũ nĩw’o weekie nĩ kana amũtangĩĩe.

Oosie kĩkavũ na akĩseũvya weethĩa kĩilika kĩw’ũ. Na ĩndĩ eekĩa Mose nthĩnĩ, na akia nyekinĩ ndaasa ũtee wa Ũsĩ wa Naelo. Na mwĩĩtu-a-inyia, Miliamu, eewa nĩekale vau vakuvĩ nĩ kana one ũndũ kũĩthĩwa.

O mĩtũkĩ mwĩĩtu wa Valao nĩwatheeie Ũsĩnĩ wa Naelo akathambe. Nake oona kĩkavũ kĩu ĩla nyekinĩ ndaasa. Na atũma ũmwe wa athũkũmi make eĩtu: ‘Enda ũndetee kĩkavũ kĩĩya.’ Na yĩla mwĩĩtu wa mũsumbĩ wakunũie kĩkavũ kĩu, we oonie kana kanake ta kĩ! Kana kau Mose nĩkaĩaa, na mwĩĩtu wa mũsumbĩ akew’ĩa ĩnee. Na ndendaa koawe.

Na ĩndĩ Miliamu ooka. Nũtonya kũmwona visanĩ ũũ. Nake amũkũlya mwĩĩtu wa Valao: ‘Nĩende ngakwĩtĩe mũndũ mũka Mũisilaeli akũee kana?’

Na mwĩĩtu wa mũsumbĩ asya, ‘Nĩngũkwĩsũva, enda.’

Kwoou Miliamu akuthũka na mĩtũkĩ akatavye inyia wake. Yĩla inyia-a-Mose wookie vala ve mwĩĩtu wa mũsumbĩ, mwĩĩtu ũsu amwĩa: ‘Kua kana kaa ũthi nako ũkandeee na ngaũnenga ĩtuvi yaku.’

Kwoou inyia-a-Mose aea kana kake mwene. Na ĩtina yĩla Mose weanangie amũtwaa kwa mwĩĩtu wa Valao, na atw’ĩka mwana wake. Ũu nĩw’o Mose weanĩie nyũmbanĩ ya Valao.

Kuma 2:1-10.