ONE kaana gaka kanini kararĩra, kanyitĩte kĩara kĩa mũirĩtu. Ũyũ nĩ Musa. No ũmenye mũirĩtu ũyũ mũthaka nũũ? Mũirĩtu ũyũ nĩ Mũmisiri, mwarĩ wa Firauni.

Nyina wa Musa aamũhithire kinya rĩrĩa aakinyirie mĩeri itatũ, tondũ ndeendaga oragwo nĩ Amisiri. No nĩamenyaga atĩ Musa no onwo, na ũũ nĩguo eekire amũhonokie.

Oire gakabu agĩgathondeka ũũ atĩ gatingĩatonyire maĩ. Agĩcoka agĩikia Musa thĩinĩ, na agĩtonyia gakabu kau nyeki-inĩ ndaihu hũgũrũrũ-inĩ cia Rũĩ rwa Nile. Miriamu, mwarĩ wa nyina na Musa-rĩ, eerĩtwo aikare hakuhĩ nĩ getha one ũrĩa gũgũtuĩka.

Kahinda o kau mwarĩ wa Firauni agĩikũrũka ethambe Rũĩ-inĩ rwa Nile. O rĩmwe akĩona gakabu nyeki-inĩ ndaihu. Agĩĩta ũmwe wa ndungata cia airĩtu ake akĩmwĩra atĩrĩ: ‘Ndehera gakabu kaarĩa.’ Rĩrĩa mwarĩ wa mũthamaki aahingũrire gakabu kau-rĩ, hĩ, onire kaana gathaka atĩa! Gakenge kau getagwo Musa nĩkaarĩraga, nake mwarĩ wa mũthamaki akĩringwo nĩ tha. Ndendire koragwo.

Miriamu agĩgĩũka. No ũmũone mbica-inĩ. Miriamu agĩkĩũria mwarĩ wa Firauni atĩrĩ: ‘Nĩ ũkwenda thiĩ ngagwĩtĩre mũtumia Mũisiraeli mũreri wa ciana akwongithagĩrie kaana gaka?’

Mwarĩ wa mũthamaki akĩmwĩra: ‘Ĩĩ nĩguo, gĩthiĩ.’

Nake Miriamu agĩgĩteng’era kwĩra nyina. Rĩrĩa nyina wa Musa okire kũrĩ mwarĩ wa mũthamaki-rĩ, mwarĩ wa mũthamaki akĩmwĩra ũũ: ‘Oya kaana gaka, ũthiĩ nako ũkanyongithagĩrie, na nĩ ndĩkũheaga mũcara.’

Rĩu Musa aagĩkĩrerirũo no nyina. Nako kaana kau gaakũra-rĩ, agĩcoka agĩgatwara kũrĩ mwarĩ wa Firauni, gagĩtuĩka mũrũwe. Ũũ nĩguo Musa agĩkũrĩire nyũmba ya Firauni.