LUSANSU LWA 28
E Mpila In’o Mose wa Nsedia Kavuluzilwa
TALA nsedia odilanga, osimbidi nlembo a ndumba ndioyo. I Mose. Ng’ozeye nani mote a ndumba ndioyo? Mwan’a Faro wa mfumu a Engipito.
Ngudi a Mose wasweka nsedia andi ngonde tatu kadi kazola ko vo kavondwa kwa Angipito. Kansi, vava kakala diaka owu kanswekela ko wavanga diambu muna kumvuluza.
Obongele finkela, olengele fio nteke ye dimbu yalembi kota maza. Osidi mo Mose. Wele fio sia muna Nzadi a Nile. O Mireyame wa nsang’andi wanyingilanga kuna vala.
O mwan’ankento a Faro okulumukini kayowela muna Nzadi a Nile. Vana vau, omwene finkela. “Otumini ntaudi andi kenda fio bonga.” Oziwidi fio, omwene Mose wa mote a nsedia odilanga. Umfwidi e nkenda. Kazola ko vo kavondwa.
O Mireyame wele ko lwaka. Untala vana fwaniswa kiaki. Ovovese mwan’a Faro vo: ‘Nga ngyenda bokela nyemeki a Ayibere kàyemekena mwan’e?’
O mwan’a Faro umvutwidi vo, “wenda.”
O Mireyame wele nswalu mu samunwina ngw’andi. Vava ngudi a Mose kalwaka kwa mwan’a ntinu, umvovese vo: “Bonga mwan’andioyu wangyemekena, ikuvana nsendo.”
Ozevo, o ngudi a Mose oyemekene mwan’a yandi kibeni. Vav’o mwana kakula, wanatwa kwa mwan’a Faro, okedi se mwan’andi. Ekiaki i kuma o Mose kasansukila muna nzo a Faro.
