KEʼYINKE tal neʼ noqʼ ex nkubʼ ttzyuʼn twiʼ tqʼobʼ txin lu. Moisés tbʼi neʼ lu. ¿Ojtzqilaʼn tuʼne alkyeju tbʼanel txin lu? Aju tmeʼl ajkawil te Egipto.

Kubʼ ewin Moisés oxe xjaw tuʼn tnan, tuʼnjo nyatoq taj tuʼn tkubʼ kybʼiyoʼn xjal te Egipto. Kubʼ t-ximan qa jakuteq kanet Moisés kyuʼn, tuʼntzunju kubʼ tbʼinchen jlu tuʼn tkyaj anqʼin Moisés.

Kubʼ tbʼinchaʼn jun chiʼl aju melayteq tzʼokx aʼ tuj. Kuxtzun tqʼoʼn Moisés toj ex xiʼ qʼolte kyxol nimaq kʼul ttzi nimaʼ Nilo tbʼi. Ax ikx xi tqʼmaʼn te Míriam aju tanebʼ Moisés, tuʼn tkyaj ten nqaku xqʼuqilte.

Kuʼpentzun tmeʼl Faraón txʼjol t-ximlal ttziʼ nimaʼ Nilo. Ntilku, mo ntlomko, jun chiʼl tkuʼx kyxol nimaq kʼul. Xi tqʼamaʼn te jun tmajen: ‹Qʼintza chiʼl tkubʼ chix›. Tej tjaw tjaqoʼn tmeʼl Faraón chiʼl, ¡tbʼanelxex tal neʼ til! Noqʼteqju tal neʼẍ Moisés, tzaj qʼaqʼin tkʼuʼj tmeʼl Faraón tiʼj. Ex mitiʼ xi tqʼoʼn ambʼil tuʼn tkubʼ bʼiyoʼn tal neʼ lu.

Ultzun Míriam. Ik tzeʼn tkuʼx toj tilbʼilal. Xitzen tqʼamaʼn Míriam te tmeʼl Faraón: ‹Qa taja jaku chinxe txkolte jun xuʼj aj Israel tuʼn t-xi tkʼaʼchin tal neʼ›.

‹Txiʼya bʼinchama xtalbʼil weye›, chi tmeʼl Faraón.

Bʼiʼx xiʼnaj Míriam txkol tnan. Tejtzen tul tnan Moisés, xi tmaʼn tmeʼl Faraón te kyjaʼ: ‹Qʼinxa tal neʼ lu, chʼiysama ex kchjetela wuʼne›.

Tuʼntzunjo, ax tnan Moisés kubʼ chʼiysante tal. Tejtzun tchʼiy Moisés xi tiʼn twitz tmeʼjel Faraón, ok tqʼoʼn tmeʼl Faraón te tal. Tuʼntzunjo, atz chʼiy Moisés toj tja Faraón.