CHÓTSENLALAI je ʼndílee xi tíkjiʼndásí xi títsoasí je najmántsja tsoti xokji. Jé Moisés. A ʼyaní ʼyáni tsoti xonaskánakji. Egipto tsʼe, tsotilení Faraón.

Je na̱le kisikʼéjnaʼma Moisés kʼianga sʼa ʼndílee saʼnda nga kichole jan sá, nga likui koanmele nga je chjota xi ya tsʼe Egipto sikʼien. Tonga be nga je chjota egipcio koa̱nsjaile je Moisés, kuinga i̱ kisʼinsíni nga tsakʼasjentjai.

Jngo ni̱si̱nyá tsakʼénda xi tsín jaʼasʼenle nandá. Ya kisikájnaya je Moisés kʼoa je ni̱si̱nyá ya kisikʼéjnajin ya jñángʼa xi tjín ya ndai xongá xi Nilo ʼmi. Kʼoakitsole Míriam, je ndichja Moisés, nga ya katabʼejnachrian ánni nga skoesíni jme xi koa̱n.

Xi koanngotjoni je tsotile Faraón kichokangoya ya xongá Nilo. Kʼoa toxijña jngo ni̱si̱nyá tsabe xi ya tíjnajin jinjñá. Kʼoa kitso jngole chjoón choʼndale: “Tʼinchʼanai je ni̱si̱nyá xokji”. Kʼianga kiskoʼaingi je tsotile Faraón je ni̱si̱nyá. ¡Li tonaskánakji ʼndílee xi tsabe! Je ʼndílee tíkjiʼndá kʼoa je tsotile Faraón koanmake. Kʼoa likui koanmele nga kinikʼien je Moisés.

Xijekoan, kichó Míriam. Koa̱n chótsenlai sén xi faʼaitʼa ibi. Míriam kitsole je tsotile Faraón: “A koa̱n kjuinchja jngole chjoón israelita xi sijcháli je ʼndílee”.

“Tʼiain kjoanda”, kitso je tsotile Faraón.

Kʼoa je Míriam kjitʼanangi kitoka nga kʼoakitsole je na̱le. Kʼianga jaʼai je na̱le Moisés jña tíjna je tsotile Faraón kitsole: “Chjoai je ʼndílee xokji kʼoa nijchánai, kʼoa kʼoechjíle”.

Kʼoakoanni nga je na̱le Moisés tije kisijcháni ʼndíle. Kʼianga je koanjchínga choa je Moisés, je na̱le ya kikaole tsotile Faraón, kʼoa ʼndíle kitsole. Kuinga ya koanjchásíni Moisés ya ndʼiale Faraón.