ВИДИ ГО бебенцево што плаче и се држи за прстот на жената. Тоа е Мојсеј. Знаеш ли која е оваа убава жена? Таа е една египетска принцеза, ќерка на фараонот.

Мајка му на Мојсеј го криела сѐ додека не наполнил три месеци, затоа што не сакала Египќаните да го убијат. Но знаела дека тие би можеле да го најдат Мојсеј, па еве што сторила за да го спаси.

Зела една кошница и ја направила за да не пропушта вода. Потоа го ставила Мојсеј во неа и ја оставила кошницата во високата трева во реката Нил. Тогаш ѝ рекле на сестра му на Мојсеј, Маријам, да стои во близина за да види што ќе се случи.

Наскоро, ќерката на фараонот слегла на реката Нил за да се капе. Одеднаш ја здогледала кошницата во високата трева. Тогаш ѝ рекла на една од своите слугинки: 'Оди, земи ја кошницана и донеси ми ја‘. Кога ја отворила кошницата, принцезата видела едно многу убаво бебе! Малиот Мојсеј плачел, а на принцезата ѝ паднало жал за него. Таа не сакала тој да биде убиен.

Тогаш излегла Маријам. Можеш да ја видиш на сликата. Маријам ја прашала ќерката на фараонот: 'Сакаш ли да отидам и да викнам некоја Израелка за да ти го дои детето?‘

'Те молам, стори го тоа‘, рекла принцезата.

Затоа Маријам брзо отрчала за да ѝ каже на мајка си. Кога мајка му на Мојсеј дошла кај принцезата, принцезата ѝ рекла: 'Земи го ова бебе и дој ми го, а јас ќе ти платам‘.

Така мајка му на Мојсеј се грижела за своето сопствено дете. Подоцна, кога Мојсеј потпораснал, го одвела кај фараоновата ќерка, која го посвоила како свој син. Така Мојсеј пораснал во куќата на фараонот.

2. Мојсеева 2:1-10.