KOTO ta̱ lée loʼo yóʼo tíinra ndaʼa̱ ñáyóʼo ta xákura. Moisés naníra. ¿Á xíni̱ún ndáañá kúú ñá ñaʼá liviní yóʼo? Ñá se̱ʼe ta̱ Faraón kúúñá.

Ñá siʼí ta̱ Moisés chi̱se̱ʼéñá ta̱ loʼo yóʼo nda̱a̱ tá ni̱xi̱nura u̱ni̱ yo̱o̱. Saáchi kǒo níkuni̱ñá kaʼní na̱ ñuu Egiptora. Soo kúnda̱a̱-iniñá kamava ndaniʼínara. Ña̱kán ke̱ʼéñá ña̱yóʼo ña̱ va̱ʼa saka̱kuñára.

I̱xava̱ʼañá iin canasta ta vií va̱ʼa i̱xava̱ʼañáña ña̱ ná kǒo ki̱ʼvi ti̱kui̱í iniña. Tándi̱ʼi chi̱ka̱a̱ñá ta̱ Moisés ini canasta yóʼo ta chi̱núuñára nu̱ú ku̱ʼu̱ súkun ña̱ íyo yatin yu̱ʼu̱ yu̱ta naní Nilo. Ta ni̱ka̱ʼa̱nñá xíʼin ñá loʼo Míriam ku̱ʼva ta̱ Moisés ña̱ ná kindo̱o yatinñá ña̱kán va̱ʼa kuniñá ndáaña ndoʼora.

Tasaá ki̱xa̱a̱ ñá se̱ʼe ta̱ Faraón kuchiñá yu̱ta Nilo. Kama xi̱niñá iin canasta nu̱ú ku̱ʼu̱ súkun yóʼo. Ta ni̱ka̱ʼa̱nñá xíʼin ñá káchíñu nu̱úñá: ʼTaxi canasta káa ndaʼíi̱ʼ. Tá xu̱náñá canasta livikaví ta̱ loʼo ndíka̱a̱ iniña. Ta xákura ndíka̱a̱ra iniña. Ñá se̱ʼe ta̱ Faraón ni̱kundáʼvi-iniñá xi̱niñára ta kǒo níxiinñá kaʼnínara.

Tasaá ki̱xa̱a̱ ñá Míriam. Koto nu̱ú na̱ʼná yóʼo va̱xiñá. Ta ki̱xaʼá káʼa̱nñá xíʼin ñá se̱ʼe ta̱ Faraón: ʼ¿Á kúni̱ún ku̱ʼi̱n ka̱ʼi̱n xíʼin iin ñá ñuu Israel ña̱ ná sakuaʼnuñá ta̱ loʼo yóʼo ta koora se̱ʼún?ʼ

Va̱ʼava, káchi ñá se̱ʼe ta̱ Faraón.

Ñá Míriam ni̱xa̱ʼa̱nñá ni̱ka̱ʼa̱nñá xíʼin siʼíñá. Tá ki̱xa̱a̱ siʼí ta̱ Moisés yóʼo, ñá se̱ʼe ta Faraón ni̱ka̱ʼa̱nñá xíʼinñá: ʼKiʼin ta̱ loʼo ta sakuaʼnura ta chaʼvii̱ yóʼóʼ.

Ña̱kán ñá siʼí ta̱ Moisés sa̱kuaʼnuñá se̱ʼe miívañá. Tá xa̱ʼnu ta̱ loʼo yóʼo saá ta̱xiñára ndaʼa̱ ñá se̱ʼe ta̱ Faraón, tasaá ni̱xa̱a̱ra ndu̱ura se̱ʼe ñáyóʼo. Veʼe ta̱ Faraón xa̱ʼnu ta̱ Moisés.