TLAPOUALISTLI 28

Konetsintli Moisés omomakixti

XIKITA konetl tlen chokatok ijkuak kikitskijtok imajpil nin ichpochtli. Ye Moisés. ¿Tikmati akin nin ichpochtli kuajkualtsin? Se ichpochtli egipcia tlen ueyititok, ichpoch ueyi tekiua Faraón.

Inantsin nin konetl Moisés okitlati eyi metstli, pampa amo okinekiaya egipcios ma kimiktikan. Maski ijkon, ye okimatiaya uelis kajsiskiaj Moisés, uan ik non, okichi nin tlamantli pampa kimakixtis.

Kuali okiyektlali se chikiuitl pampa amo kalakiskia atl. Ijkuakon, okikalaki ikone Moisés uan okitlali kanin xijyo itempa aueyatl Nilo. Uan okilui Míriam, ikni Moisés, ompa ma mokaua uan ma kita tlen kipanoskia.

San niman ichpoch Faraón otemok itech aueyatl Nilo pampa maltiskia. Uan san niman okitak se chikiuitl kanin xijyo. Uan okilui se itlakeual: ‘Xinechkuiliti chikiuitl’. Ijkuak ichpoch Faraón okitlapo chikiuitl, ¡okitak se konetsintli kuajkualtsin! Konetl Moisés ochokatoka, uan ichpochtli okiknomatki. Ichpochtli amo okinek ma kimiktikan konetsintli.

Ijkuakon, ouala Míriam. ¿Tikita itech tlaixkopinal? Míriam okitlajtlani ichpoch Faraón: ‘¿Uelis niknotsati se siuatl israelita pampa ma kiskalti konetl?’.

Ichpochtli okijto: ‘Nimistlatlaujtia ijkon xikchiua’.

Ijkuakon, Míriam omotlalo okiluito inantsin. Ijkuak inantsin Moisés oajsik kanin okatka ichpoch Faraón, ichpochtli okilui: ‘Xikuika nin konetl uan xinechiskaltili, uan nimitstlaxtlauis’.

Ijkon inantsin Moisés okiskalti ikone. Satepan, ijkuak Moisés yokipiaya okachi xiuitl, okiuikili ichpoch Faraón, uan okimalui ken yetoskia ikone. Ik non, Moisés omoskalti ikalijtik Faraón.

Éxodo 2:1-10.