Indaba 28: Indlela UMosisi Asinda Ngayo
QALA isana liyalila libambe isandla somntazana lo. Ibizo lalo nguMosisi. Uyamazi bonyana ngubani umntazana omuhle lo? Yikosazana yeGibhide indodakazi kaFaro.
Unina lakaMosisi wamfihla bewaba neenyanga eentathu ngombana angafuni amaGibhide ambulale. Kodwana gade azi bonyana uMosisi angatholakala, ngilokhu akwenzako bona amsindise.
Wathatha umantji wawulungisa bona ungangeni amanzi. Wafaka uMosisi ngaphakathi kwemantji wawubeka etjanini obude qadi ko-Mlambo iNayile. Udadwabo kaMosisi uMiriyamu, gade ajame eduze bona abone okuzokwenzeka.
Indodakazi kaFaro yeza eMlanjeni iNayile izokuhlamba. Yabona umantji etjanini obude. Wabiza enye yeencekukazi zakhe wathi kiyo: ‘Khamba uyongithathela umantji loya.’ Lapho ikosazana ivula umantji, qala umntwana omuhle kangangani! UMosisi omncani gade alila, begodu ikosazana yamrhawukela ingafuni bona afe.
UMiriyamu watjhidela njengombana umbona esithombeni. UMiriyamu wabuza indodakazi kaFaro: ‘Ngingakhamba ngiyokubiza umma wom’Israyeli azokuba yimbelesi yomntwana na?’
Ikosazana yathi kuye: ‘Ngibawa ukhambe uyombiza.’
Msinyana uMiriyamu wagijima wayokutjela unina. Lapho umma kaMosisi afika ekosazaneni, yathi kuye: ‘Thatha umntwana lo uyongimunyisela yena, ngizakubhadela.’
Ngalokho umma kaMosisi waba yimbelesi yomntwanakhe. Lokha uMosisi selamkhulu ngokwaneleko, unina wamnikela indodakazi kaFaro yamthatha yamenza indodana yayo. Ngilokho okwenza uMosisi wakhulela endlini kaFaro.
Eksodosi 2:1-10.
Iimbuzo
- Ngubani umntwana lo osesithombeni, begodu ubambe isandla sakabani?
- Khuyini okwenziwa ngunina likaMosisi ukumsindisa bona angabulawa?
- Ngubani umntazana osesithombeni, begodu khuyini akwenzako?
- Lokha indodakazi kaFaro nayifumana Umntwana lo, uMiriyamu wathini?
- Ikosazana yathini kunina kaMosisi?
Iimbuzo engezelelekileko
- Funda u-Eksodosi 2:1-10.
Ngiliphi ithuba umma kaMosisi abanalo lokubandula nokufundisa uMosisi lokha esesemncancani, begodu isibonelwesi sibarhelebha njani ababelethi namhlanjesi? (Eks. 2:9, 10; Dut. 6:6-9; Iziy. 22:6; Ef. 6:4; 2 Thim. 3:15)
