Oku Omwana Musa Yaahonire
Ekitebyo 28
Oku Omwana Musa Yaahonire
REEBA ogwo omwana muto orikurira n’oku akwatsire orukumu rw’omukazi. Ogu ni Musa. Ogu mukazi murungi nomumanya? Ni muhara wa Faraho, omugabe wa Misri.
Nyina wa Musa akashereka omwana we okuhitsya obu yaahikize emyezi eshatu y’obukuru, ahabw’okuba akaba atarikwenda ngu aitwe Abanyamisri. Kwonka naamanya ngu Musa naabaasa kuzoorwa, n’ahabw’ekyo, eki nikyo yaakozire okumujuna.
Akakora akagozi kandi yaakakora kurungi kugira ngu amaizi tigabaasa kurabamu. Atyo yaata Musa omuri ako kagozi, kandi yaakata omu bifunjo by’aha rubaju rw’Omugyera Nailo. Munyaanya wa Musa, Miriamu, bakamugambira kuguma ayemereire haihi kureeba ekiraabeho.
Omu mwanya mukye, muhara wa Faraho akashuuma aha mugyera Nailo kwoga. Atyo yaareeba akagozi omu bifunjo. Yaayeta omwe aha bazaana be: ‘Irooko ondetere akagozi kariya.’ Muhara wa Faraho ku yaafundwire akagozi, ka yaareebire omwana murungi munonga! Omwereere Musa akaba naarira, nikwo muhara w’omugabe kumukwatirwa esaasi. Tareenzire ngu aitwe.
Aho nikwo Miriamu kwija. Noobaasa kumureeba omu kishushani. Miriamu nikwo kubuuza muhara wa Faraho: ‘Nze kweta omurezi omu bakazi b’Abaheburaayo akurerere ogu mwana?’
Muhara w’omugabe yaagira ati: ‘Irooko.’
Miriamu nikwo kwiruka akagambira nyina. Nyina wa Musa ku yaizire aha muhara w’omugabe, omuhara w’omugabe nikwo kumugira ati: ‘Twara ogu mwana omunderere, naanye ninyija kukushashura.’
Atyo nyina wa Musa yaareeberera omwana we ou ayezaariire. Bwanyima Musa ku yaakuzire, yaamutwarira muhara wa Faraho, owaamutwire nk’omwana we buzima. Okwo nikwo Musa yaizire kukurira omu nju ya Faraho.
