WAK e beibi ku ta yora i ta tene dede di e yùfrou. Esei ta Moisés. Bo sa ken e yùfrou bunita ta? E ta un prinsesa egipsio, yu muhé di Fárao mes.

E mama di Moisés a skonde su yu te ora el a hasi tres luna, pasobra e no tabata ke pa e egipsionan mata Moisés. Pero e tabata sa ku nan lo por haña Moisés, i p’esei esaki ta loke el a hasi pa skap’é.

El a tuma un makutu i a fur’é di manera ku awa no por drent’é. Anto el a pone Moisés den dje i a pone e makutu den yerba haltu na kantu di Riu Nilo. El a manda Miriam, ruman muhé di Moisés, para ei serka i mira kiko lo sosodé.

Djis despues e yu muhé di Fárao a baha na Riu Nilo pa baña. Diripiente el a mira e makutu den e yerba haltu. El a bisa un kriá: ‘Bai kohe e makutu ei pa mi.’ Ora e prinsesa a habri e makutu, ki un beibi bunita el a mira! E yuchi Moisés tabata yora, i e prinsesa a sinti duele di dje. E no tabata ke pa nan mat’é.

Anto Miriam a yega. Bo por mir’é riba e plachi. Miriam a puntra e yu muhé di Fárao: ‘Mi mag bai yama un mama israelita pa kria e beibi pa yùfrou?’

‘Sí, por fabor,’ e prinsesa a kontestá.

P’esei Miriam a kore bai purá pa bisa su mama. Ora ku e mama di Moisés a yega serka e prinsesa, e prinsesa a bis’é: ‘Tuma e mucha aki i kri’é pa mi, i lo mi paga bo.’

Asina e mama di Moisés a kria su mes yu. Despues ora Moisés tabata basta grandi, e mama a hib’é pa e yu muhé di Fárao, kende a adopt’é komo su yu. Ta p’esei Moisés a lanta den e kas di Fárao.

Eksodo 2:1-10.