KJIKJ mol, woo daut kjliene Bäbe roat un de Fru äaren Finja fausthelt! Daut es Moses. Un weetst du, wäa de schmocke Fru es? Daut es de Dochta von dän Farao, de Kjennich von Ägipten.

Moses siene Mame wull nich haben, daut de Ägipta am dootmuaken. Doawäajen vestuak see am dree Moonat lank. See wist oba, eenen Dach kunnen dee äa Bäbe finjen. Un soo docht see sikj waut ut, om äa Kjint to raden.

See neem eenen Korf un muak dän dicht, daut doa kjeen Wota nenkjeem. Dan läd see dän kjlienen Moses doa nenn un sad dän Korf mank daut huage Wotagraus aune Kaunt Niel Riefa. Siene Sesta Mirjam sull een Enjskje auf bliewen un kjikjen, waut met am passieed.

Meist fuaz kjeem dän Farao siene Dochta no dän Niel sikj boden. Met eemol sach see dän Korf doa mank daut huage Wotagraus. See säd to eent von äare Deenarinnen: ‘Go hol mie mol dän Korf dort.’ Aus de Kjennichsdochta dän Korf opmuak, wia doa een schmocket Bäbe bennen! De kjliena Moses road un ar jaumad daut äwa am. See wull nich haben, daut dis kjliena Jung sull dootjemoakt woaren.

Dan kjeem Mirjam äwadäl. Du kaust ar opp dit Bilt seenen. Mirjam fruach dän Farao siene Dochta: ‘Saul ekj gonen eene Fru von de Israeliten holen toom daut Kjint fa die besorjen?’

‘Jo, doo daut toom Jefaulen’, säd de Kjennichsdochta.

Mirjam rand schwind äare Mame sajen. Aus dee kjeem, säd dän Farao siene Dochta to dee: ‘Nemm dit Kjint un besorj daut fa mie. Ekj woa die doafäa betolen.’

Soo kunn Moses siene Mame äa ieejnet Kjint besorjen. Aus Moses ieescht groot jenuach wia, brocht see am no dän Farao siene Dochta. Dee neem am han aus äaren ieejnen Sän, un soo kjeem daut, daut Moses en dän Farao sien Hus oppwoss.