AKARA ana i te pepe e aue ra, te mou ra i te mangamanga rima o te vaine. Ko Mose teia. Kua kite koe e koai tera vaine manea? E tamaine ariki aia no Aiphiti, na Pharao.

Kua uuna te mama o Mose i tana pepe no tetai toru marama, no te mea kare aia i inangaro kia tamateia e te au tangata Aiphiti. Kua kite ra aia e ka kitea a Mose, no reira ko teia tana i rave kia ora te pepe.

Kua rave aia i tetai kete e kua maani i te reira kia kore te vai e o ki roto. I reira kua tuku aia ia Mose ki roto i te reira, e kua apai atu i te kete ki roto i te ngai tita roaroa i te pae i te Kauvai Nile. Kua akakiteia kia Miriama, te tuaine o Mose kia tu ua i te pae mai e kia akara e eaa te ka tupu.

Kare i roa ana kua aere mai te tamaine a Pharao ki raro i te Kauvai Nile i te pai. Poitirere ua ake kua kite atu aia i tetai kete i roto i te ngai tita roaroa. Kapiki atu aia ki tetai o tona tavini vaine e: ‘Aere tiki mai i te kete.’ I te eeu mai anga te tamaine ariki i te kete, e pepe manea tikai tana i kite atu! Te aue ra te pepe ko Mose e kua tangi te tamaine ariki iaia. Kare aia i inangaro ana kia tamateia te pepe.

Kua aere mai i reira a Miriama. Ka kite koe iaia i roto i te tutu. Kua ui a Miriama ki te tamaine a Pharao e: ‘Ka inangaro koe kia aere au e tiki i tetai vaine Iseraela ei akono i te pepe?’

‘Ae,’ i karanga ai te tamaine ariki.

I reira kua oro viviki atu a Miriama i te akakite ki tona mama. I te aere mai anga te mama o Mose ki ko i te tamaine ariki, karanga atu te tamaine ariki e: ‘Apai koe e akono i teia pepe, naku e tutaki atu ia koe.’

No reira kua akono te mama o Mose i tana uaorai tamaiti. Muri mai, i te maata mai anga a Mose, kua apai atu aia iaia ki ko i te tamaine a Pharao, tei angai iaia ei tamaiti nana. No reira a Mose i tupu mai ei i roto i te are o Pharao.