MO BÂ tongana nyen kete bébé so ayeke toto na lo yeke gbu tïtî wali so? Iri ti bébé so ayeke Moïse. Mo hinga pendere wali so? Lo yeke molenge-wali ti Pharaon, gbia ti Égypte.

Mama ti Moïse ahonde bébé ti lo nze ota si azo ti Égypte afâ lo pëpe. Me lo hinga so ala lingbi ti wara Moïse, ni la lo sara mbeni ye ti bata Moïse na fini.

Lo mû mbeni sakpa lo kpaka colle na tere ni si ngu alinda na yâ ni pëpe. Lo zia Moïse na yâ ti sakpa ni na lo zia ni na yâ ti akota pere ti ngu ti Nil. Lo tene na Miriam, ita ti Moïse ti wali, ti luti nduru na sakpa ni, ti bâ ye so ayeke si ande.

Kete na pekoni, molenge-wali ti Pharaon aga na kota ngu ti Nil ti sukula ngu. Mo ye ti bâ, lo bâ sakpa ni na yâ ti pere. Lo iri oko ti awali so ayeke sara kua na lo, lo tene: ‘Gue mo ga na mbi sakpa so.’ Tongana molenge-wali ti Pharaon azi yanga ti sakpa ni, lo bâ mbeni pendere bébé na yâ ni. Kete Moïse ayeke toto, na mawa ti lo asara molenge-wali ti Pharaon. Lo ye si azo afâ bébé so pëpe.

Miriam apusu nduru. Mo bâ lo na lê ti foto so? Miriam ahunda na molenge-wali ti Pharaon, lo tene: ‘Mo ye mbi gue mbi ga na mbeni wali ti Israël ti mû me na lo?’

Molenge-wali ti Pharaon atene: ‘Mo gue.’

Tongaso, Miriam akpe loro ti tene tënë ni na mama ti lo. Tongana mama ti Moïse aga, molenge-wali ti Pharaon atene na lo: ‘Mû bébé so na mû na lo me, mbi yeke futa mo ande.’

Tongaso mama ti Moïse abata molenge ti lo mveni. Na pekoni, tongana Moïse akono kete awe, lo mû lo na molenge-wali ti Pharaon ti ga molenge ti lo. Ni la si Moïse akono na yâ ti da ti Pharaon.