KUNEETI danqu qaaqqi wiˈlanni beettote angichcho amadanna lai. Kuni qaaqqi Museeti. Tini xuma beetto ayiitiro afootto? Feeriooni ilino beettooti; iseno Gibitsete mootitteeti.

Muse ama qaaqqose Gibitsete manni shaannokki gede, maaxxe sase agana keeshshitu. Ikkollana Muse mannu afara dandaanno yite waajjite, iso gatissara assitinore hanni laˈno.

Gimboola haadhe wayi eannokki gede assite seekkitu. Hakkiinnino Muse hakko giddo worte, Nayili Lagi mule massite haqalu giddo wortu. Muse rodoo Maariyaami, qooxeessaho uurrite ikkannore laˈanno gede amase kultuse.

Hakkawotenni Feeriooni beetto hayishshidhara Nayili Laga daggu. Hedeweelcho haqalu giddo gimboola laˈu. Soqqamannose seenni giddo mitte woshshite, ‘Kooee gimboola abbie’ yitu. Nugusu beetto gimboola fantu wote, xumu qaaqqi giddo no! Qaaqquno wiˈlanni noo daafira marartusi. Shinasirano dihasidhino.

Hakkunni gedensaanni Maariyaami daggu. Kuneeti ise dagganna misilete aana lai. Maariyaami Feeriooni beetto, ‘Qaaqqo qansite lossitannoheta Isiraeelete mancho mare woshshoheni?’ yite xaˈmituse.

Feeriooni beettono, ‘Ee woshshie’ yitu.

Konni daafira Maariyaami amasera kultara doddu. Muse ama dagguta Nugusu beetto, ‘Konne qaaqqo qansite lossie; lossootta waaga eemmahena’ yituse.

Konni daafira Muse ama qaaqqose lossitu. Gedensaanni Muse lophphita, iso umise qaaqqo assidhinotewa Feeriooni beettowa massitu. Muse Feeriooni mine lophphinohu togoonniiti.