LUKU fa a pikin beibi e krei aladi a e hori a finga fu a misi. Disi na Moses. Yu sabi suma na a moi misi dati? A de wan umapikin fu a kownu fu Egepte, na umapikin fu Farao.

Moses mama ben hori en beibi kibri teleki a ben abi dri mun, fu di a no ben wani fu den Egeptesma kiri en. Ma a ben sabi taki sma ben kan feni Moses. Fu dati ede a ben du san e kon now fu meki a tan a libi:

A ben teki wan manki, a ben sreka en so, taki watra no ben kan pasa go na ini. Dan a poti Moses na ini. Now a go poti a manki na ini a hei grasi na a libakanti fu Nijl-liba. Moses sisa Miryam ben musu tan na ini a birti fu si san ben o pasa.

Heri esi Farao umapikin ben kon na Nijl-liba fu wasi. Wantronso a si a manki na ini a hei grasi. A ben taigi wan fu en uma-futuboi: ’Go teki a manki dati kon gi mi.’ Di Farao umapikin ben opo a manki, a ben si wán moi beibi! Pikin Moses ben e krei, so taki Farao umapikin ben firi sari fu en. A no ben wani fu den kiri en.

Dan Miryam lon kon. Yu kan si en na tapu a prenki. A ben aksi Farao umapikin: ’Mi sa go kari wan Israel-uma kon gi yu fu gi a beibi bobi?’

’Iya, tangitangi’, Farao umapikin ben taki.

Na so Miryam ben lon esi-esi go fruteri en mama fu kon. Di Moses mama ben kon, dan Farao umapikin ben taki: ’Teki a beibi disi, gi en bobi gi mi. Mi sa pai yu fu dati.’

Na so Moses mama ben man sorgu gi en eigi pikin. Bakaten di Moses ben kon bigi nofo, a mama ben tyari en go gi Farao umapikin, di ben teki en leki en eigi manpikin. Na so a ben pasa taki Moses ben gro kon bigi na a oso fu Farao.