KOANY imukeru emonyi, ido otingite ibokor luka amucalat. Erai nges Musa. Ijeni ijo ingai bo amucalat naitemelet na? Erai nges akaiyoton naka Misiri narai cut akooke Parao.

Abu totoke Musa kibwa ikekoku kiton ne araunor ilapio iuni lukapolou, narai mam nges akoto itunga luko Misiri aiyar ngesi. Konye ajeni ngesi ebe epodorio acepak adumun Musa, aso nu nesi abu ngesi iswama kanu aitajar ngesi.

Abu kolem adita, kinyonyo emina tetere mam akipi eitakinete toma. Kibwaik Musa toma, kibwaik adita toma aladoi ariri naka Ecilet Nile. Aponi kolimokinai inacike Musa Miriam aibwo kaneyapiei kanu ajenun nuiswaunos.

Kapak naedit, kobu akoku naka Parao Ocilet Nile ailong. Abu do koany adita aladoi. Konyarau adiopet akebulesin kobala ebe: ‘Kolot olemik eong adita ngin.’ Kepuko ngesi adita, koany ikoku yen ebus noi! Komonyi Musa, kitim akayaiton na nges. Komam ekoto ngesi koarai.

Kosodi Miriam abunore. Ipedori ijo aanyun nges kotoma aputo kana. Kingit Miriam akoku naka Parao ebe: ‘Alosi ca kanyarak jo aketanakan kangor nuka Iburanian kitanakik ikoku?’

Kocam akayaiton ido kobala ebe: ‘Kolot.’

Aso koker Miriam atipet anyaraun totoke. Kedolu totoke Musa nejaai akayaiton, kotema akayaiton ebe: ‘Koyanga ikoku yen, kitanakik eong, ido ataci eong ijo.’

Aso abu totoke Musa idar ikekoku. Kepolor Musa abu ngesi koyanga ngesi koinak akoku naka Parao, na abu itarau ngesi kwape okokuke. Ngol nges epone lo apolouna Musa kotogo loka Parao.