SIO ki he ki‘i pēpē ‘oku tangi pea ‘oku piki ki he tuhu ‘o e fefiné. Ko Mōsese ia. ‘Okú ke ‘ilo pe ko hai ‘a e fefine faka‘ofo‘ofa ko ‘ení? Ko e pilinisesi ‘Isipite ia, ko e ‘ofefine tonu ia ‘o Felo.

Na‘e fūfuu‘i ‘e he fa‘ē ‘a Mōsesé ‘a ‘ene pēpeé ‘o a‘u ki hono māhina tolu, koe‘uhi he na‘e ‘ikai te ne loto ke tāmate‘i ia ‘e he kau ‘Isipité. Ka na‘á ne ‘ilo ‘e ma‘u nai ‘a Mōsese, ko ia ko e me‘a ‘eni na‘á ne fai ke fakahaofi ai iá.

Na‘á ne ngaohi ha kato ke ‘oua na‘a toe lava ha vai ‘o hū ki he loto kató. Pea na‘á ne toki tuku ‘a Mōsese ki he loto kató, pea tuku ‘a e kató ‘i he ngaahi musie lalahi ‘i he Vaitafe Nailá. Na‘e fekau kia Meliame, ko e tuofefine ‘o Mōsesé, ke ne nofo ofi pē ai ‘o vakai pe ko e hā ‘a e me‘a ‘e hokó.

Na‘e taimi si‘i pē mei ai mo e ha‘u ‘a e ‘ofefine ‘o Feló ki he Vaitafe Nailá ke kaukau. Na‘e fakafokifā ‘ene sio ki he kato ‘i he loto musie lōloá. Na‘á ne ui ‘a e taha ‘o ‘ene kau sevāniti fefiné: ‘ ‘Alu ‘o ‘omai ‘a e kató kiate au.’ ‘I hono fakaava ‘e he pilinisesí ‘a e kató, ko ha toki pēpē faka‘ofo‘ofa mo‘oni ē na‘á ne sio ki ai! Na‘e tangi pē ‘a si‘i Mōsesé, pea na‘e ongo‘i ‘ofa ai ‘a e pilinisesí. Na‘e ‘ikai te ne loto ke tāmate‘i ia.

Na‘e toki ha‘u ‘a Meliame. ‘Oku lava ke ke sio ki ai ‘i he fakatātā ko ‘ení. Na‘e ‘eke ‘e Meliame ki he ‘ofefine ‘o Feló: ‘⁠Te u ‘alu ‘o ui mai ha fefine ‘Isileli ke ne tauhi ‘a e pēpeé ma‘au?’

Na‘e tali ange ‘e he pilinisesí: ‘ ‘Io, kātaki ‘o fai ia.’

Ko ia na‘e lele vave ‘a Meliame ‘o tala ia ki he‘ene fa‘eé. ‘I he ha‘u ‘a e fa‘ē ‘a Mōsesé ki he pilinisesí, na‘e pehē ‘e he pilinisesí: ‘ ‘Ave ‘a e pēpeé ni ‘o tauhi ma‘aku, pea te u totongi kiate koe.’

Ko ia na‘e tauhi ai pē ‘e he fa‘ē ‘a Mōsesé ia ‘a ‘ene tamá tonu. Ka ‘i he taimi ne motu‘a fe‘unga ai ‘a Mōsesé, na‘á ne ‘ave ia ki he ‘ofefine ‘o Feló, ‘a ia ne ohi ia ko ‘ene tama tonu. Ko e founga ia na‘e tupu hake ai ‘a Mōsese ‘i he fale ‘o Feló.