KʼELA ja yal alats wan okʼel syamunej yi ja skʼabʼ ja akʼixi. Yeʼn ja Moisés. ¿Wan maʼ xa naʼa machunkiluk ja tsamal akʼix it? Jaʼa yakʼix ja faraón.

Ja snan ja Moisés snakʼa ja yal alatsi man staʼa ja oxe ixawi, pes ja yeʼn mi skʼana oj miljuk yuj ja swinkil Egipto. Pe ja yeʼn wa snaʼa ojni tajuk kʼot ja Moisesi, ja yuj bʼa oj kanuk sakʼan ja yal alatsi, jaʼa it ja jas skʼulani.

Skʼulan jun moʼoch bʼa mi oj och jaʼ ja bʼa yojoli. Anto ti xchʼika ja Moisés bʼa yojol ja moʼochi sok ti waj snakʼ kan bʼa yoj kʼulaltik wa xkʼi bʼa yoj jaʼ. Ti yala yabʼ ja Míriam, ja swats ja Moisés, akan mojan bʼa oj skʼel ja jasa oj ekʼuki.

Tixta eljul ja yakʼix ja faraón bʼa jak atnuk bʼa jaʼ Nilo, sok tixta kʼot sat ja moʼoch tey bʼa yoj kʼulaltiki. Yala yabʼ june ja bʼa yaʼtijum ixuki: «Iʼajan ki ja moʼoch jaw». Yajni ja yakʼix ja faraón sjama ja stiʼ moʼochi, ¡yila jun yal tsamal alats! Ja yal alats Moisés wanxta ni okʼela, ja yuj ja yakʼix ja faraón jel ajula sbʼaj yila. Ja yeʼn mi skʼana amiljuk ja ala yal alatsi.

Anto ti jul ja Míriam. Wa xbʼobʼ awil ja bʼa dibujo. Ja Míriam ti sjobʼo yi ja yakʼix ja faraón: «¿Oj maʼ bʼobʼ jpayjan jun nanal israʼelenya bʼa yeʼn oj ya kʼiʼukawi ja yal alatsi?».

«Lek, aʼawa pabor», xchi ja yakʼix ja faraón.

Anto ja Míriam ti waj ajnel bʼa oj waj yal yabʼ ja snani. Yajni ja snan ja Moisés juli, ja yakʼix ja faraón ti yalaʼa: «Ito ja yal alatsi akʼiʼuki, sok ti oj tupaʼa».

Ja yuj ja snan ja yal alatsi yeʼnani ya kʼiʼuka. Tsaʼan, yajni ja Moisés ayxa sjabʼil, tixa yiʼaj och yi ja yakʼix ja faraón, ja yeʼn yila jastal yal skerem. Ja yuj ja Moisés ti kʼi bʼa snaj ja faraón.