KAʼAKXILHTI aktsu skgata, tasama chu makachipanit ama tsumat. Ama aktsu kgawasa Moisés. ¿Katsiya wix tiku tama xastlan tsumat? Xtsumat mapakgsina, Faraón xalak Egipto.

Xtse Moisés akgtutu papaʼ matsekgli, xlakata nixlakaskin namakgnikgoy li Egipto. Pero xkatsiy pi xʼamaka tekgskan, wa xlakata wa uma tuku tlawalh xlakata ni namakgnikan.

Tlawalh akgtum wajkat chuna la nixtanunilh chuchut. Alistalh mujulh Moisés chu wililh tama wajkat kxlakni xatalhman sekget kxpaxtun kgalhtuchokgo xtukuwani Nilo. Wanilh Míriam xtala Moisés pi lakatsu kaskgalalh xlakata nakatsiy tuku nalay.

Ni makgas alh kilhtamaku milh paxa xtsumat Faraón. Xalan akxilhli wajkat anta xlakni sekget xatalhman. Wanilh chatum tsumat tiku kskujni: Kakitiya tama wajkat. Akxni makgalhkgelh ¡lu xastlan skgata xtajuma! Aktsu Moisés xtasama chu xtsumat mapakgsina lakgalhamalh. Chu ni lakaskilh namakgnikan.

Alistalh Míriam milh. Akxilhpat kdibujo. Míriam kgalhskilh xtsumat Faraón: ¿Tlan nakan tasaniy chatum li Israel xlakata nakuentajtlawaniyan aktsu skgata? Kakintlawani litlan, wa xtsumat mapakgsina.

Míriam kgosnalh alh waniy xtse. Akxni milh xtse Moisés, xtsumat Faraón wanilh: Kalipi uma aktsu skgata chu kakuentajtlawa, nakxokgoniyan.

Wa xlakata Moisés kuentajtlawalh xtse. Alistalh akxni Moisés tlakg lankata xwanit linilh xtsumat Faraón, chu xtsumat Faraón la xkgawasa tlawalh. Wa xlakata Moisés stakli kxchik Faraón.