KŨLĨHISA oñaña yi kasi ndeti loku lila. Oyo yi kasi loku kuata kumuine wufeko u. Onduko yoñaña yaco, Mose. Ufeko wa posoka ndeti, omõla a Fareo soma Yegito.

Ina ya Mose ka yonguile okuti oñaña yaye yi pondiwa la va Egito. Omo liaco, wa soleka oñaña yaye toke eci ya tẽlisa olosãi vitatu. Pole eye wa kũlĩhile okuti eteke limue oñaña yaco yi ka kuatiwa.

Eye wa nyañula ohumba yimue kuenda wa yi sitika ciwa oco ka mu ka iñile ovava. Noke wa tikula Mose wokapa vohumba yaco kuenje wa yi soleka volonẽva konele Yolui Nilu. Miriama mukãi wa Mose, wa talama ocipãla oku lavulula nda kuli cimue cu senga.

Vokuenda kuoloneke vimue, omõla a Fareo ukãi wa lokila kolui Nilu oku yua. Kuenje wa mola ohumba volonẽva. Noke wa vilikiya afeko vaye hati: ‘Neneli ohumba oyo.’ Eci omõla a Fareo a tuvula vohumba yaco, wa mõla oñaña yimue ya posoka. Oñaña yaco ya fetika oku lila kuenje wa yi kuatela ohenda. Eye ka yonguile okuti oñaña yaco yi pondiwa.

Noke Miriama weya. Kũlĩhisa Miriama vociluvialuvia eci. Miriama wa popia lomõla a Fareo hati: ‘Citava okuti ngenda ha ku kovongela ukãi umue u Isareli oco a ku nyamisileko oñaña eyi?’

Eye wo kumbulula hati, ‘kuende.’

Miriama wa enda kuenje wa kovonga inaye. Eci ina ya Mose eya, omõla a Fareo wa popia laye hati: ‘Ambata oñaña eyi, ko nyamisile kuenje ndi ku feta.’

Omo liaco, ina ya Mose wa tekula omõlaye muẽle. Eci Mose a kula, wa tualiwa komõla ukãi wa Fareo. Kuenje eye wo tekula ndomõlaye. Owu owo ulandu wa Mose ndomo a kulila konjo ya Fareo.