Vhonani ṅwana muṱuku u khou lilaho, o farelela muṅwe wa musidzana. Ndi Mushe. Ni a ḓivha uri musidzana wa u naka ndi nnyi? Ndi mukololo wa Muegipita, ṅwananyana wa Farao.

Mme a Mushe o vha o dzumba ṅwana wawe u swikela e na miṅwedzi miraru, ngauri o vha a sa funi uri a vhulawe nga Vhaegipita. Fhedzi o zwi ḓivha uri Mushe a nga wanala, ngauralo a ita hezwi uri a mu tshidze.

O dzhia kudata a ku thivha uri hu si dzhene maḓi. Zwenezwo a dzhenisa Mushe khakwo, a vhea kudata hatsini vhulapfu tsini ha Mulambo wa Nile. Khaladzi a Mushe, Miriama, o vha o vhudzwa uri a ime tsini a vhone zwe zwa vha zwi tshi ḓo itea.

Nga u ṱavhanya ṅwananyana wa Farao a ḓa Mulamboni wa Nile u tamba. Nga u ṱavhanya a vhona kudata hatsini vhulapfu. A vhidza muṅwe wa vhasidzana vhawe: ‘Tshimbila u yo ndzhiela kudata.’ Musi mukololo a tshi vula kudata, a vhona ṅwana wa u naka hani! Ṅwana Mushe o vha a tshi khou lila, nahone mukololo a mu pfela vhuṱungu. A si ṱoḓe uri a vhulawe.

Zwenezwo Miriama a ḓa. Ni nga mu vhona tshifanyisoni. Miriama a vhudzisa ṅwananyana wa Farao: ‘Ndi ye u vhidza musadzi wa Muisiraele a u lelele ṅwana?’

Mukololo a ri: ‘Tshimbila.’

Ngauralo Miriama a gidima uri a ye u vhudza mme awe. Musi mme a Mushe a tshi ḓa ha mukololo, mukololo a ri: ‘Dzhia ṅwana uyu u nndelele ene, ndi ḓo u holela.’

Mme a Mushe a lela ṅwana wawe. Nga murahu musi Mushe o no aluwa, a mu isa ha ṅwananyana wa Farao, we a mu dzhia sa murwa wawe. Mushe o aluwa ngauralo nḓuni ya Farao.

Ekisodo 2:1-10.