KITAA ini nga gutiay nga bata nga nagtitinangis, ngan nakapot ha tudlo han babaye. Hiya hi Moises. Maaram ka ba kon hin-o ini nga mahusay nga babaye? Prinsesa hiya han Ehipto, nga anak mismo ni Paraon.

Igintago hi Moises han iya nanay ha sulod hin tulo ka bulan tungod kay diri niya karuyag nga patayon hi Moises han mga Ehiptohanon. Kondi maaram hiya nga bangin hibaroan nga may-ada pa buhi nga bata nga lalaki, salit ini an iya ginbuhat basi diri ito patayon.

Nagkuha hiya hin basket ngan gin-opay ito basi waray tubig nga makasulod. Katapos, ginpahigda niya ha sulod hito hi Moises, ngan iginbutang an basket ha katangboan ha Salog Nilo. An magurang ni Moises nga hi Miriam an ginsugo nga magbantay basi kitaon kon ano an mahitatabo.

Waray pag-iha an anak nga babaye ni Paraon kinadto ha Salog Nilo basi kumarigo. Nakita dayon niya an basket ha katangboan. Ginsugo niya an usa han iya mga surugoon nga babaye: ‘Kuhaa an basket.’ Han gin-abrihan ito han prinsesa, nakita niya an gwapo gud nga bata! Nagtitinangis an bata nga hi Moises, ngan nalooy ha iya an prinsesa. Diri niya karuyag nga patayon ito.

Katapos, inabot hi Miriam. Makikita mo hiya ha retrato. Nagpakiana hiya ha anak ni Paraon: ‘Matawag ba ako hin Israelita nga babaye nga magmamangno han bata?’

‘Oo, sige,’ siring han prinsesa.

Salit dinalagan dayon hi Miriam basi sumatan an iya nanay. Han an nanay ni Moises kinadto ha prinsesa, nagsiring an prinsesa: ‘Dad-a ini nga bata ngan mangnoi hiya, ngan babaydan ko ikaw.’

Salit ginmangnoan hi Moises han iya nanay mismo. Han durodaku na hi Moises, gindara hiya han iya nanay ngadto ha anak ni Paraon, nga nag-ampon ha iya sugad nga kalugaringon nga anak. Ito an hinungdan kon kay ano nga didto nagdaku hi Moises ha balay ni Paraon.