Tantara 28

Karakôry Tsy Nampanaty Mosesy Zazamena

ZAHAVA baka zazamena mitomoan̈y, mitana tan̈anan’ny man̈angy io. Izio Mosesy. Azôvy fo man̈angy zatôvo io? Izio zanaka Farao ampanjakan’Ejipta.

Mosesy koa fa teraka, nasitrin’ny mamany zisk’izy feno telo fanjava, fôtony tsy tiany izy vonen’Ejipsianin̈y aby io. Hainy fa izikoa tanàny aminany Mosesy, ho tatra edy. Zen̈y nahavy izy nan̈ano raha, beky tsaiky io tsy maty.

Maman’i Mosesy nangala kesiky hely, baka iô namboariny tsara, beky tsy hidiran-drano. Koa fa vita zen̈y, Mosesy napetrany tan̈aty tao, baka iô nalefany tamy sisin’ny Ten̈aranon’i Neily. Miriama, anabavin’i Mosesy, nirahin’ny mamany nidôko marikitry tiô, hizaha raha mandalo.

Koa fa refindrefiny, zanaka Farao man̈angy navy hiseky tamy Ten̈arano io. Tiô fo, hitany kesiky in̈y. Izy nan̈iraka ampiasanany man̈angy araiky. Volan̈iny: ‘Mindao alaiva ninakahy kesiky rỳ.’ Izikoa fa nibin̈iafiny raha io, tsaiky tsara hitany tan̈aty tao. Mosesy nitomoan̈y. Izy nahinakinaka, ke tsy foeny vonen̈a tsaiky io.

Miriama amy zay nan̈aton̈o. Izy io amy sary io. Miriama baka tiô nan̈ontany zanaka Farao in̈y: ‘Handeha tadiavako man̈angy israelita anao hitarimy tsaiky io ninao?’

‘Mindao’, volan̈iny.

Miriama nilomoay nalaky tamy mamany tan̈y. Maman’i Mosesy koa fa navy, zanaka Farao nivolan̈a: ‘Alaiva tsaiky io, tarimia, fa hifaiko karamanao.’

Maman’i Mosesy amy zay nikarakara zanany. Mosesy koa fa bebe, nateriny tamy zanaka Farao. Zanaka Farao amy zay nitarimy izy karaha zanany. Zen̈y nahavy Mosesy tombo tan-tran̈on’i Farao.

Eksodosy 2:1-10.