ALOLE kalikandi kakakulilaka, kali kakamwile cala ca jwamkongwejo. Kalikandika kali Musa. Ana akumanyilila kuti jwamkongwe jwakusalalaju ali nduni? Ali mwanace jwa mwenye jwa ku Eguputo, mwanace jwamkongwe jwa Falao.

Mama ŵakwe ŵa Musa ŵamsisile mpaka paŵakwete miyesi jitatu, ligongo nganasakaga kuti Aeguputo am’wulaje. Nambope ŵayimanyi kuti Aeguputowo komboleka kumsimana Musaju. Sambano pakusaka kumkulupusya ŵatesile ayi.

Ŵajigele citundu nikucimata kuti mesi gakajinjila. Kaneko ŵamjigele Musa nikum’ŵika mwelemo, ni ŵajigele citundu cila kuja kucileka m’manyasi gamalewulewu mungulugulu mwa Lusulo lwa Nayilo. Mlumbugwe Musa, Miliyamu, ŵamsalile kuti ajimeje pakuŵandika kuti alole yaciyitendekwe.

Mwacangakaŵa, mwanace jwamkongwe jwa Falao ŵayice ku Lusulo lwa Nayilo kukoga. Mwangajembeceya ŵaciweni citundu m’manyasi gamalewu. Ŵamsalile jumo mwa ŵamasengo ŵakwe kuti: ‘Mjawule mkanjigalile citunduco.’ Mwanace jwa mwenyejo paŵawugwile citunduco, ŵakaweni kamwanace kakusalala mnope! Kamwanace kala Musa kaliji mkulila, ni mwanace jwa mwenye jula ŵakakolele canasa. Nganasaka kuti kawulajigwe.

Kaneko Miliyamu ŵakopocele pamalo pala. Ni ajo jwakum’wona paciwulilipo. Miliyamu ŵam’ŵusisye mwanace jwamkongwe jwa Falao jula kuti: ‘Ana njawule ngaŵilanjile jwamkongwe jwa Ciyisalayeli kuti ŵasamalilileje mwanaceju?’

Mwanace jwa Falao jula ŵajanjile kuti, ‘Elo jawulani.’

Sambano Miliyamu mwacitemacitema ŵawutwice kukwasalila mama ŵakwe. Mama ŵakwe Musa ŵala paŵayice kwa mwanace jwa mwenye jula, mwanacejo ŵaŵecete kuti: ‘Ajigale likandili akasamalilile, soni cinjalipila.’

M’yoyo, mama ŵakwe Musa ŵala ŵamsamalile mwanace jwawojo. Kaneko Musa paŵakusile, ŵamjawisye kwa mwanace jwamkongwe jwa Falao. Jwalakwe ŵamjigele Musa jula kuti aŵe mwanagwe. Yeleyi ni yayatendekwe kuti Musa akulile mu nyumba ja Falao.