ADKINTUFINGE Moyse, lefmawküley Egipto mu. ¿Pefimi feychi pu wentru inantükunieeyew? ¿Kimimi chumngelu (chemu) ñi küpa langümngen Moyse? Peafiyiñ pepi inaduamafuyiñ chi am.

Moyse tremi Faraon ñi ruka mew, longkolelu Egipto mu. Kiñe fütra kim wentru ngerpuy. Moyse kimi Egipto che ngenon, ka ñi rüf pu chaw Israel ngillan kona ngey engu.

Kiñe antü, nielu meli mari tripantu, ‘Amuan ñi pemeafiel chumlen tañi pu che’, pirkey Moyse. Wedalkamekengerkey engün. Perkey kiñe Egipto che ñi küpafniefiel kiñe Israel ngillan kona. Moyse kom püle kintuwüli, penolu iney no rume ñi penieetew, allfülfi ti Egipto che, feyti wentru lay. Moyse rüngalfi feychi la, kuyüm mew.

Ka antü Moyse amurkey ñi ka pemeafiel ñi trokiñche. Rakiduamkey ñi pepi kelluafiel ñi ngillan kona ngenoal. Welu perkey epu Israel che kewatulen engu, fey Moyse feypifi ti wentru ñi wedalkameken: ‘¿Chumngelu wülelfimi tami peñi?’

Ti wentru feypi: ‘¿Iney anta elkünueymew taiñ ngünenieetew, ka kueskünueymew iñchiñ mew? ¿Ka langüman am iñche chumngechi tami langümfiel feychi Egipto che?’

Fewla Moyse llükarkey. Kimi ta inaduamün tati pu che ñi chumfiel ta Egipto wentru. Faraon allküy feymu werküfi pu wentru ñi langümafiel Moyse. Feymu lle Moyse müley ñi lefmawal Egipto mu.

Moyse tripalu Egipto mu, ka mapu amuy, Madian pingechi mapu mu. Üye mew kimürpuy Jetro ñi reñma, kiñe ñi pu ñawe, Sipora pingelu, fey kureyefi. Moyse kamañ ufisa ngefuy, ka ngüneduamniekefi Jetro ñi pu ufisa. Meli mari tripantu mülepuy Madian mapu mu. Fewla niey pura mari tripantu. Feymew kiñe antü, petu ngüneduamnielu Moyse Jetro ñi pu ufisa, rupay kiñe afmatufalchi dungu fey mu kangetuy Moyse kom ñi mongen. Rulpafinge ti pakina, ka peafiyiñ chem afmatufalchi dungu fey tüfa.