MOISESAX kamachaskisa; Egiptot tʼijsuski. ¿Arkjanisipki uk uñjtati? ¿Kunatsa Moisesar jiwayañ munapxpacha uk yattati? Akan sum yatxatañäni.

Moisesax Egipto apnaqiri Faraonan utapanwa jilsüna. Wali yatiñani aytat jaqïnwa. Moisesax jan Egiptonkir jaqïtapxa yatisïnwa, awkipas taykapas tʼaqhisisipkän uksa yatirakïnwa.

Mä uruxa, 40 maranïxan ukhaxa, kunjamäskänsa markapaxa uk uñjiriw mistüna. Sintipuniw markaparux tʼaqhisiyasipkäna. Ukatxa mä egipcioruw uñji mä israelitar nuwaskiri. Moisesax uks aks uñtäna, jan khitins uñjkataxa, uka egipcioruw jiwayäna. Moisesax chʼallaruw uka jaqxa imantäna.

Qhipüruxa wasitampiw markapar uñjirix saräna. Jan tʼaqhisipxañapataki yanaptʼañ munäna. Ukampis pä israelitanak nuwasir uñjäna, ukatsti kawkïritix sinti maynir nuwjki ukaruw säna: ‘¿Kunatsa jilat masimaru nuwta?’ sasa.

Uka jaqisti sänwa: ‘¿Khitis jumarux nanakxar jilïrita uchtam jan ukax kunatix walïki, janis walïki ukanak uñjiritsa? ¿Egipcior jiwaykta ukham jiwayañti munista?’ sasa.

Moisesax wal sustjasïna. Egipcioru jiwaykäna ukat yatipxatapa amuyasïnwa. Faraonax uk istʼasinxa, Moisesar jiwayapxañapatakiw khitäna. Ukatwa Moisesax Egiptot tʼijsuski.

Moisesax Egiptot sarxasaxa wali jay sarxäna Madián uraqir puriñkama. Ukanwa Jetron familiap uñtʼäna, ukat Jetron Séfora sat phuchapampiw casarasïna. Moisesasti uwij awatirïxänwa, Jetron uwijap awatïna. 40 maraw Madián uraqin qamäna. Jichhax 80 maranïxänwa. Mä uruxa kunapachatï Jetron uwijap awatiskän ukhaxa, wali muspharkañaw Moisesar pasäna, ukatxa jakäwipax janiw kikpäxänti. Aka janja janakipaskakma, ukanwa yatxatañäni kuna muspharkañas Moisesar pasatayna ukxa.