MONA Mose uyu alebutuka ukufuma mu Egupti. Bushe naubamona abaume abalemupepeka? Bushe nawishiba ico balefwaila ukwipaya Mose? Natumone ico acitile.

Mose akuliile mu ng’anda ya kwa Farao, imfumu ya Egupti. Aishileba uwa mano sana kabili uwacindama. Mose alishibe ukuti tali mwina Egupti, no kuti abafyashi bakwe bali bena Israele abasha.

Bushiku bumo ilyo ali ne myaka 40, Mose aile ku bantu bakwe pa kuti amone ifyo baleikala. Alyumfwile ububi sana pa fyo balebacusha. Amwene umwina Egupti aleuma umwina Israele umusha. Ilyo Mose amwene ukuti tapali uwalemonako, aumine umwina Egupti, no kufwa afwa, e lyo afisa icitumbi mu mucanga.

Ubushiku bwakonkelepo Mose aile mu kumona abantu bakwe na kabili. Alefwaya ukubafwa pa kuti bafume mu busha. Lelo ilyo amwene abena Israele babili balelwa, aebele uwalufyenye ati: ‘Mulandu nshi uleumina munonko?’

Umwaume atile: ‘Nani akusontele ukuba cilolo nelyo kapingula pali ifwe? Bushe ulefwaya unjipaye nga filya waipeye umwina Egupti?’

Ici calengele Mose ukumfwa umwenso. Alimwene ukuti abantu balishibe ico acitile. Na Farao alyumfwile ukuti Mose alipaya umuntu, kabili atumine abantu ukuti bepaye Mose. E co Mose abutukiile ukufuma mu Egupti.

Ilyo Mose afumine mu Egupti, aile ku calo ca Midiani ukutali. Kulya, aileishibana no lupwa lwa kwa Yetro, no kuupa umwana wakwe umwanakashi Sipora. Mose aileba kacema wa mpaanga sha kwa Yetro. Aikele ku Midiani pa myaka 40. Lyena bushiku bumo, ilyo Mose alecema impaanga sha kwa Yetro, kwali icintu ca kupapusha icacitike ica-alwile ifintu mu bumi bwa kwa Mose. Apa ninshi ali ne myaka 80. Pe bula lyakonkapo e po walamona icacitike.