Maana 29nan

Musa bolila ka bɔ Misira

E KA Musa bolitɔ lajɛ ka bɔ Misira. Cɛ minnu bɛ boli la a kɔ walisa k’a minɛ, i ɲɛ bɛ olu la wa? I b’a dɔn mun na u b’a fɛ ka Musa faga wa? An ka o lajɛ ɲɔgɔn fɛ.

Musa lamɔna Misira masakɛ, Faraon ka so kɔnɔ. Musa kɛra mɔgɔba ye. A hakili tun ka bon kosɛbɛ. Musa tun b’a dɔn ko ale tɛ Misiraka ye. A tun b’a dɔn ko a bangebagaw ye Israɛlkaw ye, ani k’u ye jɔnw ye.

Musa ye san 40 sɔrɔ tuma min na, a y’a latigɛ don dɔ la ka taa bɔ a balimaw ye, walisa k’a lajɛ u bɛ cogo min na. Misirakaw tun ka jugu a balimaw ma fo k’a dama tɛmɛ. Musa ye Misiraka dɔ ye ka jɔn dɔ bugɔ min ye Israɛlka ye. Musa ye a lamini lajɛ, a y’a ye tuma min na ko mɔgɔ si ɲɛ t’a la, a ye o Misiraka bugɔ ni fanga ye. Misiraka sara. Musa tilala ka cɛ su don cɛncɛn na.

O dugujɛ, Musa bɔra kokura walisa ka a balimaw lajɛ. A tun b’a kɔnɔ ko a bɛna se k’u dɛmɛ ka bɔ jɔnya la pewu. Nka, a ye Israɛlka fila ye kɛlɛ la tuma min na, cɛ min tun jo t’a la, Musa y’a fɔ o ye ko: ‘Mun na i bɛ i balimakɛ bugɔ?’

Cɛ y’a jaabi ko: ‘Jɔn ye i kɛ an kuntigi ni an kiritigɛla ye? Yala i b’a fɛ ka ne faga i n’a fɔ i ye Misiraka faga cogo min na wa?’

Musa siranna. A y’a dɔn ko a ye min kɛ Misiraka la, mɔgɔw bɔra o kala ma. Hali Faraon ye o mɛn. A ye mɔgɔw bila u ka taa Musa faga. O de y’a to Musa bolila ka bɔ Misira.

 Musa bɔra Misira tuma min na, a taara fo Madiyan jamana na. A ye Jɛtoro ni a ka denbaya ye o yɔrɔ la. A ye Jɛtoro denmuso dɔ furu, min tɔgɔ ye ko Sefɔra. Musa kɛra Jɛtoro ka sagagɛnna ye. A ye san 40 kɛ Madiyan jamana na. Musa ye san 80 sɔrɔ sisan. Don dɔ la, ka Musa to sagagɛn na kungo kɔnɔ, Musa ye kabako dɔ ye min ye yɛlɛma don a ka ɲɛnamaya la. An ka maana nata lajɛ walisa k’a dɔn o ye kabako min ye.

Ekisode 2:​11-25; Kɛwalew 7:​22-29.