TALA chize Mose anatuhuka fuji mu Engitu. Yena unamono amwe malunga anamukaula fuji munyima lienyi? Yena unanyingika mumu liaka ayo anambe kushaha Mose? Tutalenu nyi mutuhasa kunyingika mumu liaka.

Mose kanakakolela ku zuwo lia Falau, mwanangana wa mu Engitu. Iye yapwa lunga munene nawa yapwa ni mana anji. Mose te kananyingika ngwo iye hi Ka-Engitu ko, alioze iye te kananyingika ngwo atato A-Izalele te tupinji.

Limwe tangwa, muze iye te hakumbanyisa 40 a miaka, Mose yanyonga kuya ni kutala asoko jenyi chize anapu. A-Izalele kanakapwa ni kwaamwesa lamba linji. Iye yamona umwe Ka-Engitu te kanalamba umwe kapinji Ka-Izalele. Mose yatala sali ni sali, muze iye kamwene niumwe mutu, yalamba Ka-Engitu, yamushaha. Hohene Mose yavumbika mufu wacho mu mavu.

Tangwa likwo, Mose yaya nawa ni kumeneka asoko jenyi. Iye yanyonga ngwo hanji mahasa te kwakwasa, hanga achine kupwa mu upinji. Mba iye yamona amwe malunga aali A-Izalele te kanalilamba, alioze Mose yamba kuli yoze te uli mu uhenge ngwenyi: ‘Mumu liaka yena unalamba usoko we?’

Lunga wacho yamba ngwenyi: ‘Yena, iya kevwe wakusa mwata ni ngaji mukachi lia yetwe? Unambe kungushaha ngwe chize unakashaha Ka-Engitu nyi?’

Mose yevwa woma. Iye yamona ngwo atu hanyingika kulu yize ngunakalinga kuli Ka-Engitu. Chipwe Falau yachinyingika, kashika iye yatuma atu hanga ashehe Mose. Ha chino, Mose yatuhuka mu Engitu yachina.

Muze Mose atuhukile mu Engitu, iye yaya kusuku mu chifuchi cha A-Mindiane. Kuzekwene iye yanyingika asoko ja Yetoru, nawa yalimbata ni umwe mwanenyi jina lienyi Zepora. Mose yapwa kafunga wa mapanga nawa yafunga mapanga ja Yetoru. Iye yalinga 40 a miaka mu chifuchi cha A-Mindiane. Iye yapwa ni miaka 80. Limwe tangwa, muze te Mose anatembula mapanga ja Yetoru, yikupwa chimwe chuma, chize chinakalumuna mwono weswe wa Mose. Fukula lifwo hanga umone yize yinakapwako.