PIIRAKAA nümüin Moisés; eipinnüshi nia. ¿Piʼrüin na eipiijakana nia? ¿Pütüjaa aaʼu jamüshi nuʼutuneeka aaʼin? Wekirajaa sünain.

Miyoʼushi Moisés suluʼu nipia Faraón, chi aluwataaikai Egipto. Kekiishi maʼin Moisés. Nütüjaa aaʼu nnojoluin egipcioin nia, israeliita chi nüshikai otta tü niikat.

Soʼu wanee kaʼi, wanaa sümaa 40 nuuyase Moisés, waraittüshi nia naʼakapünaa na israeliitakana süka müliain naya atumawaa, niʼraka wanee egipcio niʼyaajüin wanee israeliita. Süka nnojoluin niʼrüin wayuu nüʼütpünaa, nuʼutaka naaʼin chi egipciokai, nunjulaka nia mmapü.

Waneemüin kaʼi waraittaka nia nüchikuaʼa naʼakapünaa na israeliitakana. Nükaaliinjeein süpüla nnojoluinjanain achepchieein naya. Niʼraka atkaain piamashii israeliita. Nümaka Moisés nümüin chi asheʼetüshikai: ‹¿Jamüshi püsheʼejaka chi puwalakai?›

Nümaka chi wayuukai nümüin: ‹¿Jara eʼitaaka pia süpüla puluwataain waaʼu? ¿Puʼutuinjachi aaʼin taya maʼaka puʼutuin naaʼin chi egipciokai?›

Nüinkuuka aaʼin Moisés, süka sütüjaanüipain aaʼu tü naainjalakat. Naapapa shia Faraón nuluwateʼeraka wayuu süpüla suʼutuin naaʼin Moisés. Makalaka nuʼluwataain Egiptojee.

Süchikijee nuʼunuin Egiptojee, antüshi nia suluʼumüin tü mmakat Madián. Niʼraajaka nüpüshi Jetró, kasaatka nia sümaa wanee nüchon kanüliasü Ziporá. Arüleejüishi Moisés naʼanneetse Jetró. Kepiashi nia 40 juya Madián. Wanaa sümaa 80 nuuyase Moisés alatüsü nümüin wanee kasa awanajeʼeraka nukuwaʼipa. Pülatira süpana tü karalouktakat süpüla wekirajaain sünain tü alatakat nümüin Moisés.