EMAʼẼMI Moisés rehe; okañyhína Egíptogui. Rehechápa umi omuñáva chupe? Ndépa reikuaa mbaʼérepa ojukase hikuái Moiséspe? Jahechami ikatúpa jaikuaa.

Moisés okakuaavaʼekue Faraón rógape, pe ogovernáva Egipto. Oiko chugui peteĩ mburuvicha iñarandúva. Moisés oikuaavaʼekue ndahaʼeiha ehípsio, ha ituvakuéra haʼeha esklávo isrraelíta.

Peteĩ díape, Moisés oguerekórõ guare 40 áño, oho ohecha mbaʼéichapa oiko ihentekuéra. Ojetrata vai oikóvo chupekuéra. Ohecha peteĩ ehípsiope oinupã jave peteĩ isrraelítape. Moisés omaña opárupi ha ndohecháimarõ avavépe, oinupã pe ehípsiope ha ojuka. Upéi haʼe ojaty pe teʼõngue yvykuʼípe.

Upe día ohasa rire Moisés oho jey ohecha ihentekuérape. Haʼe opensavaʼekue ikatuha oipytyvõ chupekuéra anive hag̃ua oiko esklávoramo. Péro ohecha mokõi isrraelítape oñorairõhápe, ha heʼi pe hembiapo vaívape: ‘Mbaʼére piko reinupã ne ermánope?’.

Pe kuimbaʼe heʼi chupe: ‘Máva piko ojapo ndehegui ore hués ha governanterã? Chejukáta piko avei pe ehípsiope rejukahaguéicha?’.

Kóva omondýi Moiséspe. Ohechakuaa ojekuaamaha pe ehípsiore ojapovaʼekue. Faraón jepe oikuaáma, ha omondo umi kuimbaʼépe ojuka hag̃ua Moiséspe. Upévare Moisés okañy Egíptogui.

Osẽrõ guare Moisés Egíptogui, oho Madiánpe, peteĩ tetã mombyry opytáva upégui. Upépe oikuaa Jetró ha ifamíliape, ha omenda itajýra Ziporá rehe. Moisésgui oiko pastór ha oñangareko Jetró ovechakuéra rehe. Madiánpe oiko 40 áño. Koʼág̃a oguerekóma 80 áño. Upérõ, peteĩ díape Moisés oñangareko jave Jetró ovechakuéra rehe, oiko peteĩ mbaʼe guasu okambiavaʼekue hekove. Ehasa pe ótra páhinape rehecha hag̃ua mbaʼépa upe oikovaʼekue.