TAQSIṬ TIS 29

Acuɣer yerwel Musa

MUQEL Musa! Atan yerwel si Maṣer. Twalaḍ irgazen-​agi i t-​ittabaɛen? Teẓriḍ ayɣer i bɣan a t-​nɣen? D ayen ara nwali tura.

Musa yekker-​ed deg wexxam n Ferɛun yellan d agellid n Maṣer. Yuɣal d argaz yelhan yerna d ukyis. Musa yeẓra belli mačči d Amaṣri i gella. Yeɛlem daɣen belli imawlan-​is n ṣṣeḥ llan d aklan iɛibṛaniyen.

Yiwen wass, mi yewweḍ 40 n sna, Musa iṛuḥ ad iẓer liḥala ideg yella wegdud-​is. Aqhar is i ţwaqehren d ayen ur iqebbel leɛqel. Iwala zdat-​es yiwen Umaṣri yekkaten Aɛibṛani. Musa imuqel ssya wesya. Mi gɣil weḥd-​es i gella, iwet Amaṣri-​nni, yenɣa-​t. Umbeɛd, yeffer lǧeţţa-​s di ṛṛmel.

Azekka-​nni yuɣal Musa ad iẓer agdud-​is. Yenwa yezmer ad iɛiwen At Isṛayil a d-​ssufɣen iman-​nsen si liḥala n waklan ideg i llan. Meɛna iwala sin Iɛibṛaniyen ţţemceččawen wway gar-​asen. Musa yenna i win akken iḍelmen: ‘Acimi i tekkateḍ gma-​k?’

Argaz-​nni yerra-​yas: ‘Anwa i k-​yerran d aneḥkam neɣ d lqaḍi fell-​aɣ? Eɛni tebɣiḍ a yi-​tenɣeḍ akken tenɣiḍ Amaṣri-​nni?’

Musa tekcem-​it tugdi. Yefhem belli yeţwafḍeḥ-​ed wayen yexdem i Umaṣri-​nni. Ula d Ferɛun iwweḍ-​it lexbaṛ, dɣa iceggeɛ irgazen ad nɣen Musa. Ɣef wannect-​a i gerwel Musa si Maṣer.

Musa yerwel armi ţ-​ţamurt n Midyan. Dinna immuger-​ed tawacult n Yitru, yuɣal yezweǧ d yiwet si yessi-​s yeţţusemman Ṣifura. Musa yuɣal d ameksa n tqeḍɛit n uḍeggal-​is Yitru. Iɛac 40 iseggasen di tmurt n Midyan. Tura yewweḍ 80 iseggasen di leɛmeṛ-​is. Yiwen wass, yella ikess lmal n Yitru, mi s-​d-​teḍra yiwet n lḥaǧa yessewhamen, i gbeddlen akk tudert-​is. Taqsiṭ i d-​iteddun a ɣ-​d-​teḥku ayen yeḍran.

Tuffɣa 2:11-25; Lecɣal 7:22-29.