LAJ Moises yook chi elelik. Ma nakaanaw kʼaʼut keʼraj xkamsinkil laj Moises? Qilaq kʼaʼut yookebʼ xtaqenkil.

Laj Moises kikʼiik saʼ rochoch laj Faraon, joʼkan naq wank xwankil ut wank xnawom. Abʼan naxnaw naq aʼan aj Israel ut moko xkomonebʼ ta laj Egipto.

Laj Moises wank 40 chihabʼ re naq xko rilbʼal chanru wankebʼ li xkomon. Laj Moises kiril naq ra wankebʼ laj Israel. Jun laj Egipto yook xsakʼbʼal jun rehebʼ laj Israel. Naq laj Moises kiril naq maaʼani yook chi ilok re, kixkamsi laj Egipto. Tojaʼ naq kixmuq rubʼel li samahibʼ.

Naq kisaqewk, laj Moises xko wiʼ chik chi rilbʼalebʼ laj Israel. Kixkʼoxla naq truuq xtenqʼankilebʼ re naq teʼxkanabʼ wank choʼq xmoosebʼ laj Egipto. Naq kiril wiibʼ laj Israel yookebʼ xsakʼbʼal ribʼebʼ kixye: ‹Kʼaʼut nakaasakʼ laakomon?›

Kichaqʼok li winq li yook chi sakʼok: ‹Ani xyehok aawe naq tatraqoq aatin saʼ qabʼeen? Ma tinaakamsi joʼ xaakamsi laj Egipto?›

Kʼajoʼ naq kixuwak laj Moises xbʼaan naq kixkʼe reetal naq ak nekeʼxnaw chik li kixbʼaanu re laj Egipto. Ut naq laj Faraon kirabʼi naq laj Moises kixkamsi laj Egipto, kixtaqla xkamsinkil. Joʼkan naq kiʼelelik laj Moises.

Naq laj Moises kiʼelk Egipto, kiwulak saʼ jun najtil tenamit, Madian xkʼabʼaʼ. Saʼ li tenamit aʼin kixnaw ru laj Jetro ut li xjunkabʼal. Chirix chik aʼan kisumlaak rikʼin xZipora, jun rehebʼ li xrabʼin laj Jetro. Laj Moises kiʼok rilbʼalebʼ li xkarneer laj Jetro. Kaʼkʼaal chihabʼ kiwank laj Moises saʼ li tenamit Madian. Saʼ li jun chik tzolom tqanaw kʼaru kixkʼul laj Moises naq wank 80 chihabʼ re.