KIFWANISU kesonga beno Moïse ketina insi ya Egypte. Beno kemona bantu kelanda yandi? Beno kezaba sambu na nki bau kezola kufwa Moïse?

Moïse yelaka na nzo ya Faraon, mfumu ya Egypte. Yandi kumaka muntu ya lukumu sambu na ngangu na yandi. Moïse vandaka kuzaba nde yandi vandaka ve muntu ya Egypte mpi nde bibuti na yandi vandaka bampika.

Kilumbu mosi, ntangu yandi vandaka na bamvula 40, mabanza kwisilaka Moïse na kwenda kutala bampangi na yandi. Yandi monaka bisalu ya mpasi yina bantu na yandi vandaka kusala mpi monaka dyaka muntu mosi ya Egypte kebula mpika ya Israele. Moïse kubulaka muntu yina ya Egypte mpi yandi fwaka, sambu yandi yindulaka nde muntu monaka yandi ve. Na nima Moïse zikaka nitu ya muntu yina na zelo.

Kilumbu yina kulandaka, Moïse vutukaka sambu na kutala bampangi na yandi. Yandi yindulaka nde yandi tasadisa bau na kukatuka na kimpika. Yandi talaka na ndambu yankaka mpi yandi monaka babakala zole ya Israele kenwana. Moïse tubaka na muntu yina salaka mambi nde: ‘Sambu na nki nge kebula mpangi na nge?’

Yandi vutulaka nde: ‘Nani metula nge mfumu mpi zuzi na kati na beto? Nge kezola kufwa mono bonso nge fwaka muntu ya Egypte?’

Moïse kuwaka boma. Yandi monaka nde mambu yina yandi salaka na kilumbu lutaka kuzabanaka. Nsangu yina kukumaka mpi na Faraon, mpi yandi tindaka bantu sambu na kufwa Moïse. Moïse kumonaka kima yankaka ya kusala ve, mpi yandi tinaka insi ya Egypte.

Moïse kwendaka kuzinga na insi ya Madian. Kuna yandi zabanaka na dibuta ya Jethro. Yandi kwelaka mwana ya Jethro ya nkento, yina vandaka na zina ya Zipporah. Moïse kumaka ngungudi mpi yandi vandaka kulangidila bitwisi ya bokilo na yandi Jethro. Yandi zingaka na Madian bamvula 40. Ntangu yai, yandi kumaka na bamvula 80. Kilumbu mosi, ntangu yandi vandaka kudisa bitwisi ya bokilo na yandi, Moïse monaka dyambu mosi ya kuyituka yina sobaka luzingu na yandi. Balutiti yina kelanda ketubila beto nki dyambu yina ya kuyituka..