TARORA Musa akĩũra kuuma Misiri. Nĩ ũrona andũ mamũingatĩte? Nĩ ũũĩ kĩrĩa kĩratũma mende kũũraga Musa? Ta reke tuone kana no tũmenye.

Musa aakũrĩire nyũmba ya Firauni, mũthamaki wa Misiri. Agĩtuĩka mũndũ mũũgĩ na ningĩ mũnene. Musa nĩ aamenyaga atĩ ndaarĩ Mũmisiri, no atĩ aciari aake Aisiraeli maarĩ ngombo.

Mũthenya ũmwe-rĩ, arĩ na ũkũrũ wa mĩaka 40, Musa nĩ eeciririe gũthiĩ kuona ũrĩa andũ ake matariĩ. Nĩ maaherithagio ũru mũno. Akĩona Mũmisiri akĩhũra ngombo ya Mũisiraeli. Musa agĩcũthĩrĩria mwena ũyũ na ũyũ ũngĩ, rĩrĩa onire atĩ hatirĩ mũndũ ũrorete, akĩringa Mũmisiri ũcio akĩmũũraga. Agĩcoka akĩmuumbĩka mũthanga-inĩ.

Naguo mũthenya ũyũ ũngĩ Musa akiumagara akone andũ ake rĩngĩ. Eeciragia no amateithie nĩguo matikanatuĩke ngombo rĩngĩ. Akĩona andũ erĩ Aisiraeli makĩhũrana, nake Musa akĩĩra ũrĩa wogitĩte ũrĩa ũngĩ atĩrĩ: ‘Ũrahũra mũrũ wa nyũkwa nĩkĩ?’

Mũndũ ũcio akĩmũũria atĩrĩ: ‘Wee nawe-rĩ, nũũ ũgũtuĩte mũnene witũ o na mũtũtuithania? Anga o na niĩ ũkũnjũraga ta ũrĩa ũroragire Mũmisiri?’

Nake Musa agĩgĩĩtigĩra. Nĩ ũndũ nĩ aamenyire atĩ andũ nĩ moĩ ũrĩa arekire Mũmisiri. O na Firauni nĩ aiguiĩte ũhoro ũcio, agĩgĩtũma andũ makorage Musa. Nĩkĩo gĩatũmire Musa ore kuuma Misiri.

Hĩndĩ ĩrĩa Musa oimire Misiri, orĩire bũrũri wa kũraya wetagwo Midiani. Kũu-rĩ, agĩcemania na famĩlĩ ya Jethiro, na akĩhikia ũmwe wa airĩtu ake wetagwo Zipora. Musa agĩtuĩka mũramati wa ng’ondu cia Jethiro. Agĩgĩtũũra bũrũri ũcio wa Midiani ihinda rĩa mĩaka 40. Na rĩu agĩgĩkorwo arĩ na ũkũrũ wa mĩaka 80. Mũthenya ũmwe akĩrĩithia ng’ondu cia Jethiro-rĩ, gũkĩgĩa na kĩũndũ kĩa magegania kĩrĩa kĩagarũrire mũtũũrĩre wa Musa kuuma hĩndĩ ĩyo. Garũra karatathi gaka, nĩguo tuone kĩũndũ kĩu kĩa magegania nĩ kĩrĩkũ.