AKIMONA Mosesa ubena kunyema kufuma mu Ijipita. Wibamona bano banabalume ba bena kumupangisha nyi? Wayuka kine kintu kyo babena kukebela kumwipaya Mosesa nyi? Twaya tumone umvwe twakonsha kuyuka.

Mosesa wakomejile mu nzubo ya kwa Felo, mfumu wa Ijipita. Wajinga bingi na maana kabiji wakosele bingi. Mosesa wayukile’mba kechi wajinga mwina Ijipita ne, kana kuba’mba bansemi banji bena Isalela bajinga bazha.

Juba jimo, Mosesa byo afikizhe myaka ya kusemwa 40, wafuukwilepo kuya na kumona bantu banji byo baikajilenga. Kechi bebalaminenga bulongo ne. Wamwene mwina Ijipita byo apuminenga mwina Isalela umo muzha. Mosesa watajile kuku ne kuku ne kumona wamwene’mba kafwako wamumwenenga ne, wapumine mwina Ijipita ne kufwa wafwile. Kepo Mosesa azhikile uno muntu wafwile mu busenga.

Juba jikwabo Mosesa wayile na kumona balongo banji jibiji. Walangulukilenga mwakwibakwashisha kuba’mba baleke kwibayanjisha. Bino wamwene bena Isalela babiji saka balwa, kepo aambijile watamishishe’mba: ‘Mambo ka o ubena kupumina mulongo obe?’

Mwanamulume waambile’mba: ‘Ñanyi wakupa bufumu nangwa bumutonyi bwa pe atweba? Wasaka kungipaya byonka byo waipayile mwina Ijipita nyi?’

Kepo Mosesa aubile moyo. Wayukile’mba bantu bayuka kala kyo aubile ku mwina Ijipita. Nangwatu Felo waumvwine, kabiji watumine banabalume kuya na kumwipaya Mosesa. Kino kyo kyalengejile Mosesa amba anyememo mu Ijipita.

Mosesa byo afumine mu Ijipita, wanyemejile ku kyalo kya Mijanyi kwalepa. Akwa wakataine kisemi kya kwa Yefelo kabiji wasongwelepo mwananji umo wamukazhi jizhina janji Zipola. Mosesa waikajile ke kafunga kabiji walaminenga mikooko ya kwa Yefelo. Waikajile mu kyalo kya Mijanyi myaka 40. Pano wafikizhizhe myaka ya kusemwa 80. Kepo juba jimo Mosesa byo afungilenga mikooko ya kwa Yefelo, kwamwekele kintu kimo kya kukumya kyapimpwile bwikalo bonse bwa kwa Mosesa. Zhikula pa peja ikwabo, tumone kino kintu kya kukumya.