TALA Mose otinini tuka muna Engipito. Ng’omwene wantu benkulandanga? Ng’ozeye ekuma bazolele kumvondela? Yambula twatala.

O Mose mu nzo a Faro wa ntinu a Engipito kasansukila. Okitukidi se nkwa ngangu kikilu. O Mose wazaya wo vo ke mwisi Ngipito ko, amase mandi abundu, Aneyisaele.

Lumbu kimosi, vava kalungisa mvu 40, o Mose wele tala una wazingilanga yitu yandi. Funtunwa kikilu bafuntunwanga. Omwene Ngipito owandanga Nyisaele. Otadidi y’oku y’oku, vava kamona vo ke vena muntu ko, owende o Ngipito, ofwidi. Unswekele mun’esenge.

E lumbu kiezole wele tala diaka nkangu andi. Edi kabanzanga vo olenda kubavevola muna ubundu. Kansi, omwene Aneyisaele wole benwananga. Ovovese ndiona wavang’edi diambi vo: “Adieyi owandila nkw’aku?”

Oyandi umvutwidi vo: ‘Nani utumbidi e kinkuluntu ye kimfundisi kieto? Ng’ozolele kumponda una wavondèle o Ngipito e?’

O Mose omwene o wonga. Obakwidi vo e diambu kavanga kwa Ngipito dizayakene. O Faro mpe owidi dio. Otumini wantu bavonda Mose. Ekiaki i kuma Mose ketininanga tuka muna Engipito.

Wele zingila muna nsi a Midiani. Ozayidi nzo a Yitero, osompele mwan’andi mosi ankento, nkumbu andi Sipora. O Mose okitukidi se mvungudi a mameme ma Yitero. Ozingidi mvu 40 muna nsi a Midiani. Owau, 80 lwa mvu se kena. Lumbu kimosi, vava Mose kalunga-lunganga mameme ma Yitero, wamona diambu diasivi diasoba zingu kiandi kiawonso. Ziula lukaya lulende wamona diambu diadi diasivi.