Chihande 29

Chuma Achinyinyine Mose

TALA Mose anakuchina muEjipitu. Unavamono malunga vali nakumuhangasana tahi? Unejiva ocho vanakusaka kujihila Mose nyi? Tutalenu nge natuhasa kuchijiva.

Mose akolelele muzuvo yamwangana waEjipitu, Fwalo. Alemene nakufumakana chikuma. Mose ejivile nge kapwile kaEjipituko, oloze visemi jenyi vakumusema hivaIsalele vakwachile undungo.

Likumbi limwe, hakuheta myaka yakusemuka 40, Mose alovokele nakuya nakutala muvapwile nakuyoya vausoko wenyi. Vapwile nakuvayanjisa chikuma. Amwene kaEjipitu mwaveta ndungo wakaIsalele. Mose atalile noku noku, kaha hakumona ngwenyi kakwapwile mutu avamweneko, avetele kaEjipitu, kaha afwile. Jino Mose avumbikile mujimba wenyi muusekeseke.

Likumbi likwavo Mose alovokele nakuya nakumona cheka vausoko wenyi. Asakile avakafwe mangana undungo ukume. Oloze amwene vaIsalele vavali vanakuliveta, shikaho Mose ambile kuli uze aluwishile ngwenyi: ‘Unakumuvetela ika ndumbwove?’

Uze lunga ngwenyi: ‘Iya nakulingisa ove kupwa umwangana wakutuyula etu? Unakusaka ungujihe nge omu wajihanga uze kaEjipitu tahi?’

Mose evwile jino woma. Atachikijile ngwenyi vatu vanejiva chuma alingile kuli kaEjipitu. Fwalo nawa achivwile, kaha atumine malunga nakuya vakajihe Mose. Shikaho Mose achinyinemo muEjipitu.

Mose hakufuma kuEjipitu, ayile kulifuchi lyaMichane lyapwile kwakusuku. Kuze akawanyine tanga yaYetelo, nakumbata mwanaYetelo wapwevo, Jipola. Mose apwile kafunga wamikoko jaYetelo. MuMichane atwaminemo myaka 40. Himwaheta myaka yakusemuka 80. Kaha likumbi limwe, omu Mose apwile nakufunga mikoko jaYetelo, amwene chuma chakukomwesa chize chalumwine kuyoya chenyi chosena. Pandumuna lifwo, kaha tutalenu chuma kanechi chakukomwesa.

Kulovoka 2:11-25; Vilinga 7:22-29.