MPANJI 29

Chaletesheli Mosi Kutemuka

TALAÑA Mosi chinakutemukayi kufuma muEjipitu. Wunayimoni awamayala anakumuhaña? Wuneluki muloña wuyanakukeñelawu nawu amujahi Mosi? Tutalenu ntahi neyi tukutwesha kuwiluka.

Mosi wakulilili mwitala daFwaro, mwanta waEjipitu. Wekalili muneni nawa muntu wamaana. Mosi welukili nindi hadiña mwini Ejipituku, ilaña anvwali jindi alala adiña aIsarela anduñu.

Ifuku dimu, henohu washikija dehi yaaka 40, Mosi wanyamukili nakuya nakutala chadiña nakuhandawu antaña jindi. Adiña nakuyihemba chatama nankashi. Wamweni kaEjipitu nakweta nduñu kaIsarela. Mosi watalili niniku niniku, chamweniyi nindi kwosi muntu wadiña nakumumona, wamujahili kaEjipitu. Dichi Mosi waswekeli mujimba wanowu muntu muwusekulula.

Ifuku dalondelelihu Mosi wayili nakutala cheñi antaña jindi. Watoñojokeli nindi watela kuyikwasha kulonda abuli kwikala cheñi anduñu. Ilaña wamweni amayala ayedi aIsarela anakuzuña, dichi Mosi wahosheli nanona wakoñeli chatama nindi: ‘Wunakumweteladi mana kweyi?’

Ona iyala wahosheli nindi: ‘Indi eyi wunakwilishi nyuli yetu ninsompeshi yetu hinyi? Wuneli neyi wunjahi neyi chiwajahili kaEjipitu?’

Mosi watiyili woma. Welukili nindi antu aneluki dehi nawu wajahili kaEjipitu. NiFwaro wachitiyili, dichi watemesheli antu kulonda amujahi Mosi. Dimuloña waweni watemukililiyi Mosi kufuma muEjipitu.

Mpinji yafuminiyi Mosi muEjipitu, wayili kwakulehi nankashi kwituña daMidiyani. Kweniku waweni chisaka chaYetero, dichi wasumbwili mwana kaYetero wejina daZipora. Mosi wekalili kabiña nawa wabiñileña nyikoku yaYetero. Washakamini hadi yaaka 40 mwituña daMidiyani. Washikijili yaaka 80 yakusemuka. Ifuku dimu chadiña Mosi nakubiñayi nyikoku yaYetero, chuma chimu chakuhayamisha chamumwekeneni nawa chahimpili nichihandilu chindi chejima. Bakulaku ifu kulonda tumoni ichi chihayamisha.

Kwidika 2:11-25; Yililu 7:22-29.