KIʼNKE Moisés; ma tzʼetz oq toj Egipto. ¿Nchi tila, moqa nchi tlome, xjal luqe lepchiqeʼtz tiʼj? Kyajbʼil tuʼn tkubʼ kybʼiyoʼn, ¿ojtzqiʼn tuʼne tiquʼn? Qo xnaqʼtzal tiʼj tiquʼn.

Atz chʼiy Moisés tuj tja Faraón, aju ajkawil toj Egipto. Ten nim tnabʼil ex ok qʼoʼn toklen. Ojtzqiʼntaq tuʼn Moisés qa nya aj Egiptoteq, ex qa aqe ttat aj Israelqeʼ.

Tej qʼiʼnteq 40 abʼqʼi tuʼn Moisés, kubʼ t-ximen tuʼn t-xiʼ kaʼyil qe t-xjalil qa bʼaʼn ateʼtoq. Noktaq bʼinchen mya bʼaʼn kyiʼj. Tlom, moqa til, Moisés jun aj Egipto nokteq tbʼiyoʼn jun aj Israel. Tnejil xi tkeʼyin Moisés qa mitiʼtoq jun xjal nkintz tiʼj, oktzun tbʼiyoʼn aju aj Egipto, ex bʼiʼx kyim tuʼn. Kux tewin Moisés toj ttxa tzʼaʼn (tzʼawin).

Tuj juntl qʼij xiʼ Moisés juntl maj kaʼyil qeʼ t-xjalil. Kubʼ t-ximen qa jakutoq chi onit tuʼn, tuʼn miʼ kyoktl te majen. Ok tkeʼyin kabʼe aj Israel nchi bʼiyenteq, xitzun tqʼamaʼn Moisés teju nbʼiyentaq: ‹¿Tiquʼn nnok tbʼyoʼn t-xjalila?›

Xitzun ttzaqʼweʼn xinaq te: ‹¿Alkye ma tzʼok qʼon teya te nejenel ex te jwes qibʼaje? ¿Ok chin kbʼel tbʼyoʼna ik tzaʼn kubʼ tbʼyoʼna aju aj Egipto?›

Tzajtzun xobʼ Moisés. El tnikʼ qa oteq kybʼi xjal aju otaq tzʼok tbʼinchen tiʼj xjal aj Egipto. Ax ikx oteq tbʼi Faraón, xitzun tsamaʼn Faraón qe xjal tuʼn tkubʼ kybʼiyoʼn Moisés. Tuʼntzunjo, etz oq Moisés toj tnam Egipto.

Tejtzen tetz Moisés tuj Egipto xiʼ tzmax toj txʼotxʼ te Madián. Atz jatumel e ok tojtzqiʼn qeju tuj tja Jetró, ex kubʼ mojeʼ tukʼe jun tmeʼl, aju Zípora tbʼi. Ok Moisés te xqʼuqil t-rit Jetró. Anqʼin 40 abʼqʼi toj txʼotxʼ te Madián. Tej qʼiʼntaq 80 abʼqʼi tuʼn. Jun qʼij, tej nxqʼuqinteq Moisés kyiʼj qe t-ẍneʼl Jetró, ikʼ jun tiʼ aju chʼixpuj tanqʼibʼil Moisés tuʼn. Qo ikʼx tuj juntl t-xaq, tuʼntzen tel qnikʼ tiʼj.