CHÓTSENLALAI Moisés; tíbangale naxinandá Egipto. A tiʼyaní xi tjíotokatjenngisíle. A ʼyaní ánni nga mesínile sikʼien Moisés. Kataʼyala tsa koa̱nnchoyaná anni.

Moisés ya koanjchá ya ndʼiale Faraón, xi tsakatéxoma Egipto. Je Moisés nʼio chjine koan kʼoa nʼio ngʼa tsakʼejna. Moisés tjínjinle nga tsín chjota Egipto kitjenni, kʼoa nga je xi ñaki xíjchále koanni je choʼnda israelita.

Jngo nichxin, nga je ñachan nóle Moisés, kikotsenle josʼin tjíoni naxinandále. Totaon tjíoʼya. Jngo chjota egipcio tsabe xi jngo choʼnda israelita tíbʼéle. Moisés kiskotsen jngotjondai, kʼoa nga tsabe nga liʼya chjota tjín xi ya tjíosíkuinda, kisikiʼaon chjota egipcio, kʼoa kʼien. Moisés ya kisikájnaʼma je kʼien ya jintsomí.

Xi koannyaonni je Moisés ti kikotsenngánile naxinandále. Kʼoasʼin kisikjaʼaitsjen tsakai nga koa̱n koasenkao nga tsínti choʼnda katamani. Tonga jao choʼnda israelita tsabe nga tjíokján, kʼoa Moisés kitsole je xi chʼao tísʼin: “Ánni nga ndsʼai tibʼesínilai”.

Chjota jebi kitso: “ʼYáni xi chjota títjon kʼoa jueznajin kasíkaoli”. A kʼoatisʼin sikʼiennai josʼin kinikʼain chjota egipcio xonákji”.

Kitsokjon Moisés. Tsabe nga je kisʼejinle chjota jmeni xi kisikao je chjota egipcio. Saʼnda kisʼejinle Faraón kʼoa kisikasén chjota nga katasíkʼien Moisés. Kuinga tsakangasínile naxinandá Egipto.

Kʼianga kitjoni Moisés ya Egipto, kjin ki, ya ki ʼnde Madián. Ya tsabexkon yaniʼyale Jetró, kʼoa jngo tsotile Jetró chixankao xi Ziporá tsakʼin. Barré kiskoʼnda Moisés, kʼoa jé kisisinle barréle Jetró. Ñachan nó tsakʼejna ya ʼnde Madián. Kʼoa ñokan nó je kisʼele. Xijekoan, jngo nichxin nga tíkoʼnda barréle Jetró, tokʼoakoanle jmeni xi koan kʼoa ñaki kisikʼantjaiya josʼin tíjna. Titjakaolai xingoani, kʼoa kataʼyala jméni xi tokʼoa koanle.