Sturka 29

Dia Muni Moses Ba Plapan

MOSES Idsipt wina plapi ba kaiki kais. Bara witin ra nina bliki bangwi ba kaikisma ki? Dia muni witin ra ikai kan sapa nu sma ki? Kaisa tanka pliki kaikaia.

Moses ba Idsipt kingka Fero watla ra pawan. Baha mita witin ba sinskira bara kulkanka tara bri kan. Pain nu kan witin Idsipt uplika apia kan, bara ai aisika yaptika rait aihwa ba, Israel uplika Idsipt ra alba nani kan.

Yu kum witin 40 mani bri kan pyua ra, ai uplika nani ba nahki sa sapa kaikaia wan. Bara witin uba saura muni kan kaikan. Idsipt uplika kum mita Israel uplika kum ra pruki kan kaikan. Bara witin ai tnaya nani ra kaikan, upla kumi sin witin ra kaikras kan, witin Idsipt uplika ba ra pruki ikan. Bara witin wîna ba yukukaia wisi auhya ra bikan.

Witin yu wala kli ai uplika nani ra kaikaia wan. Witin nani ba kau alba bangwi kabia apia dukyara help munaia luki kan. Baha wina witin Israel uplika wal nani aiklabi kan kaikan, bara Moses mita saura dauki kan uplika ra win: ‘Dia muni muihkam ra prukisma ki?’

Bara waitnika ba mita Moses ra win: ‘Ya mita yang nani puri kakaira bara lâika dadaukra baku mai mangkan? Man Idsipt waitnika ra ikram ba baku yang ra sin ai ikaisma ki?’

Bara Moses ba naha wali uba sirang iwan. Witin nu kan Idsipt waitnika ra dia munan ba upla nani pliki kaikan kan ba. Bara naha sturka Fero sin walan kan, bara witin waitna kum kum ra blikan wan Moses ra ikbia wisi. Baha mita, Moses ba Idsipt wina plapaia kan.

Witin Idsipt wina plapan taim, Median tasbaia ra plis laiura kum ra wan. Baha ra witin Jetro pamalika ra kakaira takan, bara luhpia mairin kum nina Sipura kan ba wal marit takan. Witin Jetro syîpka nani main kakaira takan. Bara witin Median tasbaia ra 40 mani baku iwi takaskan. Yu kum witin 80 mani bri kan pyua ra, Jetro syîpka nani ba main kaiki kan ba ra, diara aihka kum takan, baha dukya ba mita Moses rayaka aiska ba sat wala ra lakan. Kaisa wahya wala ba ra, dia dukya kan sapa kaikaia.

Impakan sturka 2:11-25; Wark nani 7:22-29.