TLAPOUALISTLI 29

Tleka ocholo Moisés

XIKITA Moisés; kistok itech Egipto uan cholojtok. ¿Ueli tikinmitaj akinmej kitokatokej? ¿Tikmati tleka kinekij kimiktiskej Moisés? Ma tikitakan kox uelis tikmatiskej.

Moisés omoskalti ikalijtik Faraón, akin otlanauatiaya itech nochi Egipto. Omochi ixtlamatki uan oueyitijtoka. Moisés okimatiaya ye amo okatka egipcio, uan akinmej melauak itatajuan okatkaj tlakeualtin israelitas.

Se tonal, ijkuak yokipiaya 40 xiuitl, Moisés otlachiato ken okatkaj israelitas. Okintlajyouiltijtokaj. Okitak se egipcio tlen okiuitekiaya se tlakeuali israelita. Moisés opejki tlajtlachia, uan ken amo akaj okitak, okiuijuitek egipcio, uan egipcio omikik. Moisés okitlalpacho mikatl ijtik xali.

Mostlatika, Moisés oksepa okinmitato israelitas. Okineltokaya uelis kinpaleuiskia pampa ayakmo yetoskiaj tlakeualtin. Maski ijkon, okinmitak ome israelitas tlen omoteuijtokaj, uan Moisés okilui akin otlauijuitekiaya: ‘¿Tleka tikuijuiteki mokni?’.

Tlakatl okijto: ‘¿Akin omitstlali ken totlayekanki uan juez? ¿Tinechmiktis ijkon ken otikmikti egipcio?’.

Axkan Moisés omomojti, pampa tlakamej yokimatiayaj tlen okichiuili egipcio. Noijki Faraón okimatki uan okinnauati sekimej tlakamej ma kimiktikan Moisés. Ik non, Moisés totoka okiski itech Egipto uan ocholo.

Ijkuak Moisés okiski itech Egipto, oyajki uejka uan oajsik Madián. Ompa okinmixmatki ichanejkauan Jetro, uan omonamikti iuan se ichpoch, tlen omotokayotiaya Zípora. Moisés omochi tlajpixki uan okinmaluiaya ichkauan Jetro. Ochanti itech Madián 40 xiuitl. Axkan yokipiaya 80 xiuitl. Ijkuakon, ipan se tonal, ijkuak Moisés okinmaluiaya ichkauan Jetro, opanok itlaj tlen okitlajtlachialti miak uan okipatlak nochi inemilis. Xipano itech okse página, uan ma tikitakan tlen tlamantli okitlajtlachialti miak.

Éxodo 2:11-25; Hechos 7:22-29.