Ekitebyo 29

Enshonga Ahabwaki Musa Yaahungire

REEBA Musa naahunga kuruga Misri. Nooreeba abo bashaija abarikumwirusya? Noomanya ahabw’enki nibenda kwita Musa? Ka tureebe yaaba twakubaasa kukizoora.

Musa akakurira omu nju ya Faraho, omutegyeki wa Misri. Akagira obwengye bwingi kandi yaaba omushaija rugambwa. Musa akaba naamanya ngu akaba atari Munyamisri, kureka ngu abazaire be bakaba bari Abaheburaayo abahuuku.

Eizooba rimwe, obu yaabaire aine emyaka 40 y’obukuru, Musa akacwamu kuza kureeba oku abantu be baabaire bari. Kikaba nikigwisa kubi oku baabaire nibatwazibwa. Akareeba Omunyamisri arikuteera Omuheburaayo omuhuuku. Musa yaamagamaga, kandi ku yaareebire hataine oriho, yaateera Omunyamisri kandi Omunyamisri yaafa. Reero Musa nikwo kushereka omutumbi gwe omu musheenyi.

Ku bwaseesire, Musa yaagarukayo kureeba abantu be. Akateekateeka ngu naabaasa kubahwera kugira ngu barekye kuba abahuuku. Kwonka yaareeba Abaisraeli babiri nibarwana, nikwo Musa kugambira owaabaire ari omu nshobi ati: ‘Ahabw’enki nooteera mwene sho?’

Omushaija yaamugarukamu ati: ‘N’oha owaakuhaire obushoboorozi bw’okututegyeka n’okutucwera emanja? Nooyenda kunkuratsa Omunyamisri ou oitsire?’

Musa yaatiina munonga. Yaamanya ngu abantu bamanyire eki akozire Omunyamisri. Kandi na Faraho akakihurira, yaayohereza abashaija kumwita. Egi niyo nshonga ahabwaki Musa yaahungire kuruga omuri Misri.

Musa ku yaarugire Misri, yaaza hare munonga omu nsi ya Midiani. Okwo, akabugana eka ya Yesero kandi yaashwera omwe ahari bahara be orikwetwa Zipora. Musa yaaba omuriisa, yaariisa obusyo bw’entaama za Yesero. Kumara emyaka 40 akatuura omu nsi ya Midiani. Hati akaba aine emyaka 80 ey’obukuru. Eizooba rimwe, ku yaabaire ariisize entaama za Yesero, ekintu kirikutangaaza kyabaho ekyahindwire amagara ga Musa goona. Shuuruura orupapura, tureebe eki ekintu eki kiri.

Okuruga 2:11-25; Ebyakozirwe 7:22-29.