CHAWILAMPEʼ ri Moisés; tijan kanmajik. ¿La xawilo chin täq kketarbʼen (ketarnem)? ¿La awetaʼm suche kekaj kekamsaj ri Moisés? Chqilampeʼ suche.

Moisés xkʼiy pa rachoch ri Faraón, wajun achi Faraón are ri ajqʼatbʼaltzij puwiʼ Egipto. Moisés xubʼan nim uqʼij xuqujeʼ kʼo nim retaʼmbʼäl. Moisés retaʼm che egipcio täj, xuqujeʼ retaʼm che rutat unan xa e israelitas.

Jun qʼij, chiʼ ri Moisés kʼo 40 ujunabʼ, xbʼe che rilik su kibʼanom ruwinaq. Xrilo che tijan ubʼanik kʼäx chike. Xril jun aj egipto tijan kuchʼay jun israelita. Moisés xril apanoq we kʼot chin tijan krilo, chiʼ xrilo che kʼot nijun winaq tijan krilo, xuchʼiyo tekʼuriʼ rumal wariʼ ri egipcio xkamik. Moisés xumuq kan ri egipcio pa sanyibʼ.

Ri jun chik qʼij ri Moisés xtzalij chik rech keʼurilaʼ. Areʼ kubʼij che kkunik keʼutoʼo rech kbʼan ta chi mos chike. Tekʼuriʼ xeril e kebʼ israelitas tijan kkebʼan chʼoj, ri Moisés xubʼij che ri achi tijan kchʼayonik: ‹¿Suche tijan kachʼay rawachalal?›

Jewaʼ xubʼij ri achi che Moisés: ‹¿Jachin xubʼij chawe at che are at kabʼan qʼatbʼaltzij pa qawiʼ? ¿La are kawaj kinakamsaj junam che xabʼan che ri achi egipcio?›

Ri Moisés xuxibʼij ribʼ. Xrilo che ri winaq xketaʼmaj su xubʼan che ri egipcio. Xuqujeʼ ri Faraón xretaʼmaj, rumal waʼ xutaq ukamsaxik ri Moisés. Xa rumal wariʼ che Moisés rajawaxik xanmaj bʼik.

Chiʼ Moisés xel bʼi pa Egipto, naj xbʼe wi, xbʼe pa jun tinamit ubʼiʼ Madián. Chilaʼ Madián xretaʼmaj uwäch jun achi ubʼiʼ Jetró, xuqujeʼ ri Moisés xkʼuliʼ rukʼ ri Ziporá, wajun ali are jun chike rumiʼal ri Jetró. Ri Moisés xubʼan ajyuqʼ pa kiwiʼ ronojel ruchij ri Jetró. 40 junabʼ xkʼejeʼ ri Moisés pa ri tinamit Madián. Xqʼax ri junabʼ tekʼuriʼ ri Moisés kʼo chi 80 ujunabʼ. Jun qʼij chiʼ ri Moisés tijan keʼuyuqʼuj täq chij, xril jun jasach (jun kos) che xujal ukʼaslemal. ¿Sulaʼ xrilo? Chupam ri jun chik bʼantajik kqil na sulaʼ xrilo.