LUKU fa Moses e lowe komoto na Egepte. Yu e si den man di e lon na en baka? Yu sabi fu san ede den wani kiri Moses? Meki wi go luku efu wi man kon sabi dati.

Moses ben gro kon bigi na a oso fu Farao, a tiriman fu Egepte. A ben tron wan koni man di ben abi barinen. Moses ben sabi taki a no ben de wan Egeptesma, ma taki en trutru papa nanga mama ben de srafu di ben de Israelsma.

Wan dei, di Moses ben abi 40 yari, a ben bosroiti fu go luku fa a e go nanga en pipel. En ati ben priti fu si fa den ben e du nanga den. A ben si fa wan Egeptesma ben e naki wan srafu di ben de wan Israelsma. Moses ben luku lontu; di a ben si taki nowan sma ben e luku, a ben naki na Egeptesma kiri. Dan Moses ben kibri a skin na ini a santi.

A tamara fu en Moses ben go baka agen fu luku en pipel. A ben prakseri taki a ben man yepi den, so taki den no ben abi fu de srafu moro. Ma a ben si tu Israelsma e feti. Fu dati ede a ben taigi a wan di no ben abi leti: ’Fu san ede yu e naki yu brada?’

A man ben piki: ’Suma ben meki yu tron a tiriman nanga krutuman fu wi? Yu wani kiri mi tu, soleki fa yu ben kiri na Egeptesma dati?’

Moses ben kon frede now. A ben sabi taki sma ben kon sabi san a ben du nanga na Egeptesma. Srefi Farao ben yere fu dati. A ben seni man fu kiri Moses. Na dati meki Moses ben musu lowe komoto na Egepte.

Di Moses gowe libi Egepte, a ben go farawe te na a kondre Midian. Drape a ben miti na osofamiri fu Yeitrow. A trow nanga Sipora, wan fu den umapikin fu Yeitrow. Moses ben tron wan skapuman. A ben luku den skapu fu Yeitrow. A ben libi 40 yari langa na a kondre Midian. A ben abi 80 yari now. Dan wan dei di a ben e sorgu gi den skapu fu Yeitrow, wan fruwondru sani ben pasa, san ben kenki en heri libi. Drai a bladzijde opo, èn luku san ben de a fruwondru sani disi.