КӨРЕМ, Моисе́й Еги́петтен дезип бар чыдар. Ооң соондан улус сүрүп кел чыдыр, көрүп тур сен бе? Ол улус чүге Моисе́йни өлүрер деп турарыл, билир сен бе? Ындыг-дыр, билип алырын кызып көрээли, че.

Еги́петтиң чагырыкчызы, фарао́ннуң бажыңынга Моисе́й өзүп келген. Ол аажок алдарлыг болгаш мерген-угаанныг кижи апарган. Ол бодун еги́петчи эвес, а ооң шын ада-иези — изра́ильчи кулдар деп, Моисе́й билир турган.

Бир-ле катап, 40 харлыында, Моисе́й бодунуң чонун канчаар чурттап турар эвес дээш, барып көөрүн шиитпирлээн. Чонну аажылап турарын көөрге, коргунчуг болган. Бир еги́петчи кижи изра́ильчи кулду канчаар эттеп-соп турарын ол көрүп каан. Долгандыр көрзүнгеш, улус көрбейн турарын ылавылааш, Моисе́й еги́петчи кижини шанчыптарга, ол өлүп калган. Ооң соонда Моисе́й ооң мөчүзүн довурак иштинче хөөп каапкан.

Дараазында хүн бодунуң чонун көөр дээш, Моисе́й база катап үнүп келген. Ол чонунга дузалажып, оларны дарлалдан үндүрүп шыдаар мен деп бодап турган. Ынчалза-даа аразында чокшуп турган ийи изра́ильчилерни ол көрүп кааш, буруулуг кижиге мынча дээн: ‘Бодуңнуң эжиңни чүге эттеп турарың ол?’

‘Кым сени бистиң даргавыс база шииткекчивис кылдыр тургузуп каан? Еги́петчини өлүргениң ышкаш, мени база өлүрүксеп тур сен бе?’ — деп, ол харыылаан.

Моисе́й корга берген. Еги́петчи-биле чүнү кылганын улустар билип каапкан деп, ол билген. Ооң дугайында фара́он безин билгеш, Моисе́йни өлүрери-биле кижилер чорудупкан. Ынчангаш Моисе́й Еги́петтен дезер ужурга таварышкан.

Еги́петтен Моисе́й ырак Мадиа́м черинче дезипкен. Аңаа Иофорнуң өг-бүлези-биле таныжып алгаш, ооң уругларының бирээзи, Сепфора дээр уруунга өгленип алган. Моисе́й Иофорнуң хой кадарчызы апарган. Мадиам черинге ол 40 чыл чурттаан. Ам ол 80 харлыг апарган. Бир-ле катап Моисе́й Иофорнуң хоюн кадарып чорда, ооң чуртталгазын долузу-биле өскертипкен, кайгамчыктыг болуушкун болган. Дараазында арынны ажыдыпкаш, кандыг болуушкун болганын билип алыр сен.